کابل؛ افاق خبري اژانس: د کونړ پر سیند د ۴۸.۷ میلیونه افغانیو په ارزښت کېبلي پل د جوړولو چارې پیل شوې.
د کونړ د کلیو د بیارغونې او پراختیا ریاست د استازي حاجي مسعود په وینا، دغه پل د ناړۍ ولسوالۍ د څونهګلې په سیمه کې جوړېږي، چې ۱۴۰ متره اوږدوالی، ۳.۲۰ متره پلنوالی او ۱۷۰ متره نښلونکی سړک لري.
نوموړی وايي، د دغه پل لګښت د اسلامي امارت له پراختیايي بودیجې ورکول کېږي او ټاکل شوې د جوړولو چارې یې په نهو میاشتو کې بشپړې شي.
د ناړۍ ولسوال امینالله شهاب د دغه پل د جوړولو د چارو د پیل هرکلی کړی او ویلي یې دي، چې د دې پروژې په بشپړېدو سره به د سیمې د اوسېدونکو د تګ راتګ ستونزې راکمې او د خلکو لپاره به ټرانسپورټي اسانتیاووې برابرې شي.