د ریاستالوزرا اقتصادي مرستیال ملا عبدالغنی برادر، د افغانستان لپاره د برېټانیا له ځانګړي استازي ریچارد لینډزي سره لیدنه کې د پاکستان د پوځي بریدونو په اړه خبرې کړې دي. د برېټانیا استازي د دغو بریدونو له قربانیانو سره د خواخوږۍ ترڅنګ، افغانانو سره د خپل هېواد د مرستو پر دوام ټینګار کړی دی.
په ورته وخت کې، که څه هم د کابل او اسلامآباد ترمنځ ترینګلتیاوې یو ځل بیا زیاتې شوې او پاکستان د هېواد پر ځینو برخو، په ځانګړي ډول کونړ باندې توپچي او راکېټي بریدونه کړي، خو د افغان کډوالو موضوع لا هم د دواړو هېوادونو ترمنځ یوه له مهمو موضوعاتو ګڼل شمېرل کېږي. یو شمېر افغان کډوال چې تازه هېواد ته راستانه شوي وایي چې د کابل او اسلامآباد ترمنځ د اړیکو په خرابېدو سره، پاکستان کې د افغان کډوالو لپاره د ژوند شرايط خورا سخت شوي دي. دوی د کډوالو اړوند ملاتړو بنسټونو غواړي، چې د ستونزو حل لپاره یې لاس په کار شي او ټینګار کوي، چې د کډوالو موضوع باید له نورو سیاسي او امنیتي مسایلو سره ګډه نشي.
له پاکستانه راستون شوی نظر آفاق خبري آژانس سره خبرو کې وایي: «اوس مهال د افغان کډوالو وضعیت ډېر د اندېښنې وړ دی. هلته د کورونو کرايې ډېرې لوړې شوې دي، له کوره بهر ته تګ راتګ نه شي کولی. له نړۍوالو سازمانونو غوښتنه کوو، څو پاکستان ته ووایي چې کډوال د سیاسي وسیلې په توګه ونه کاروي.»
پاکستان کې د افغان کډوالو وضعیت له خرابېدو سره هممهاله، پاکستاني بوځ پر افغان خاوره توپچي او توغندیزو بریدونو ته هم زور ورکړی او دې چارې د دواړو هېوادونو اړیکې د بل هر وخت په پرتله ترینګلې کړې دي. د ملګرو ملتونو د بشري مرستو د همغږۍ ادارې (اوچا) په خپل راپور کې ویلي چې د اسلامي امارت او پاکستاني ځواکونو ترمنځ تازه نښتو له امله بشري اړتیاوې زیاتې شوې او دا چاره ملکي وګړو ته زیانونه رسوي.
د سیاسي چارو شنونکی سید محسن حسیني آفاق خبري آژانس سره خبرو کې زیاتوي: «دا چې پاکستان د خبرو اترو او ډیپلوماسۍ له لارې د ستونزو حل ته چندان لېوالتیا نه ښيي، دا برداشت پیاوړی کېږي چې د افغانستان پر وړاندې د فشار او ترینګلتیا تګلارې د هغه هېواد د سیاست یوه برخه ده. په مقابل کې، افغانستان تل هڅه کړې چې د ښه ګاونډیتوب اصل مراعات کړي او څو ځله یې د خبرو او ګډ تعامل له لارې د اختلافاتو د حل لپاره چمتووالی ښودلی دی.»
د چارو یو شمېر نور شنونکي په دې باور دي، چې د افغانستان پر وړاندې د پاکستان اقدامات د بشري حقونو او نړیوالو اصولو خلاف دي. د دوی په وینا، د دغه هېواد موخه د ترینګلتیاوو رامنځته کول او د دوهاړخیزو اړیکو زیانمنول دي، او له نړیوالو بنسټونو غواړي چې د دې تګلارې مخنیوي په پار، پر اسلامآباد فشار راوړي.
د نړۍوالو چارو شنونکی نجیبالرحمن شمال بیا په دې اړه داسې لیدلوری لري: «د افغانستان پر وړاندې د پاکستان اقدامات د بشري حقونو او نړیوالو اصولو ښکاره سرغړونه ده؛ د دغه هېواد هدف د ترینګلتیاوو زیاتول او د دوهاړخیزو اړیکو کمزوري کول دي، او نړیواله ټولنه باید د دې د مخنیوي لپاره پر اسلامآباد فشار راوړي.»
دا په داسې حال کې ده، چې د پاکستاني پوځ په وروستیو بریدونو کې لږ تر لږه ۷ کسانو ژوند بایللی او ۸۱ نور ټپیان شوي، چې زیاتره یې عام وګړي، به ځانګړي ډول ښځې او ماشومان دي.