آفاق خبري آژانس؛ کابل: د کابل او دوشنبې ترمنځ د دیپلوماسۍ د ښه کېدو په لړ کې، سرچینو آفاق خبري آژانس ته منلې، چې نن د تاجکستان د بهرنیو چارو وزارت او امنیتي بنسټونو یو لوړ پوړی پلاوی کابل ته راغلی.
دا سفر په تیرو څلور کلونو کې کابل ته د دوشنبې له مستقیمو اړینو اړیکو شمېرل کیږی، چې د سیاسي، اقتصادي او امنیتي اړیکو د پراخیتا په موخه د دواړو هېوادونو ترمنځ ترسره شوی دی.
سرچیني تاییدوي، چې د خبرو اترو یو له مهمو موضوعاتو څخه به په دوشبنې کې د افغانستان د سفارت پرانیسته وي.
د سیاسي چارو شنونکی عزیز ستانکزی وايي:« تاجیکستان په تېر کې د افغانستان اسلامي امارت ته د دښمن په توګه کتل او له موږ سره یې ښې اړیکې نه درلودې، خو د اسلامي امارت د بهرنیو چارو وزارت وتوانېد چې د دواړو هېوادونو ترمنځ د باور جوړولو بهیر پیل کړي. نن افغانستان ته د تاجیکستان د پلاوي سفر ممکن شوی، څو په تاجیکستان کې د افغانستان سفارت او په کابل کې د تاجیکستان دیپلوماتیکي بنسټ پرانیستل شي. دغه اقدام به د دواړو هېوادونو په اړیکو کې مهمه ونډه ولري.»
کابل ته د تاجیکستان د پلاوي سفر او په افغانستان کې د دوشنبې سفارت پرانیستلو موضوع رابرسیره کیدو سره، اوس پوښتنه دا ده چې دا بدلون به څومره وکولی شي د دواړو هېوادونو ترمنځ سیاسي او امنیتي اړیکو ته بدلون ورکړي او ایا افغانستان به د کابل او دوشنبې ترمنځ د اړیکو د نوي څپرکي شاهد وي؟
د سیاسي چارو شنونکی نثار احمد شیرزی وایي:« تاجیکستان د سفارت جوړولو او په سيمه کې د نورو هېوادونو د اقداماتو لپاره، د هر هېواد ګټو د ساتنې هڅه کوي. په تیرو څلورو کلونو کې افغانستان کې د ملګرو ملتونو کمزوري فعالیت ډیری هېوادونه دې ته اړ کړي چې په خپلواکه توګه له افغانستان سره تعامل وکړي. له اسلامي امارت سره د تاجیکستان د ډیپلوماتیکو اړیکو جوړول هم د دې کمزورۍ پایله ده. هېوادونه هڅه کوي خپل رول او ګټې په سیمه کې تثبیت کړي.»
د سیاسي چارو شنونکی میاګل وثیق وایي:« پاکستان له افغانستان سره اوږده پوله لري او هغه اندېښنې چې په تېر کې یې لرلې لا هم شته، په ځانګړي ډول د امنیت اندېښنې. خو په هر حال، هر څومره چې د افغانستان او تاجکستان اړیکې ښې او نږدې شي، کولی شي د دې اندېښنو په کمولو کې مرسته وکړي. له اقتصادي اړخه هم دا همکاري ښه فرصت دی، چې افغانستان خپلې سوداګریزې اړیکې د منځنۍ آسیا هېوادونو سره پراخې کړي او تاجیکستان هم غواړي په دې برخه کې فعاله ونډه ولري.»
دا په داسې حال کې ده، چې د اسلامي امارت له بیا واکمنیدو وروسته، د افغانستان او پاکستان ترمنځ اړیکې پراخې شوې دي.
د بلخ والي تاجیکستان ته سفر درلود او هلته یې د یاد هېواد له چارواکو سره لیدلي دي.
د تاجیکستان ولسمشر د ملګرو ملتونو په عمومي ناسته کې ویلي، چې تاجیکستان په افغانستان کې له سولې، ټیکاو، اقتصادي او ټولنیز پرمختګه ملاتړ کوي.