په داسې حال کې چې د کابل او اسلاماباد ترمنځ اړیکې لا هم په کړکېچین وضعیت کې دي، د افغانستان لپاره د چین ځانګړي استازي یو شاویونګ، پاکستان ته له سفر او د دغه هېواد له چارواکو سره تر لیدنو وروسته په خپله اېکسپاڼه لیکلي چې له پاکستاني چارواکو سره د هغه وروستۍ لیدنې د افغانستان په تړاو د لا زیات باور او همکارۍ فضا رامنځته کړې ده.
هغه ویلي له پاکستاني چارواکو، په ځانګړي ډول امنه بلوچ او محمد صادق سره لیدنې د راتلونکو همکاریو او له افغانستان سره د ورورولیزو اړیکو د پیاوړتیا لپاره زمینه برابره کړې ده.
یو شاویونګ ویلي: «له امنه بلوچ، د بهرنیو چارو وزارت له منشي او د افغانستان لپاره له ځانګړي استازي او نورو چارواکو سره زما لیدنې ښې وې. دواړو خواوو ته د راتلونکو همکاریو او له افغانستان سره د ورورولیزو اړیکو د پیاوړتیا لپاره ښه اعتماد رامنځته شو.»
د سیاسي چارو شنونکي توریالي ځاځي په دې اړه ویلي: «چین د پاکستان له ټولو کړنو خبر دی او اوس چې پاکستان د حسن نیت نښې ښودلې دي، بیا هم پر دغه هېواد بشپړ باور نشي کېدای. د افغانستان خلک او اسلامي امارت باید خپله هڅه وکړي چې له دې وضعیت څخه ځان وباسي.»»
په همدې حال کې د چین ځانګړي استازي د خپلو لیدنو په دوام په اسلاماباد کې د اروپايي ټولنې له استازي او د افغانستان لپاره د اروپايي ټولنې له ځانګړي استازي سره هم لیدلي دي. په دې لیدنه کې هم د سیمې د وروستیو بدلونونو او د دوامدارې سولې او امنیت د ټینګښت په اړه خبرې شوې دي.
یو شاویونګ ویلي: «پرون مې په اسلاماباد کې د اروپايي ټولنې له استازي اریک کورزویل او د افغانستان لپاره د اروپايي ټولنې له ځانګړي استازي ګیل برتراند سره لیدنه وکړه. په دې لیدنه کې د سیمې د بدلونونو په اړه رغنده خبرې وشوې او د دوامدارې سولې او امنیت پر ټینګښت ټینګار وشو.»
دا په داسې حال کې ده چې له جاپان وروسته، په ملګرو ملتونو کې چین ته د افغانستان د دوسیې ارزونه او مخ ته وړل سپارل شوي دي. شنونکي باور لري چې بېجینګ هڅه کوي د سیمهییزو او نړیوالو مشورو په پراخولو له افغانستان سره د نړیوالې ټولنې او ملګرو ملتونو اړیکې ورغوي خو دا به وروسته څرګنده شي چې چین تر کومه بریده په دې بهیر کې ګټور رول لوبولی شي.