د ایران په بریدونو کې د امریکا د څو جنګي الوتکو نسکورېدو او هوايي تجهیزاتو له منځه وړلو راپورونو له خپرېدو وروسته، د دغه هېواد ولسمشر ډونالډ ټرمپ په خپل غبرګون کې هڅه وکړه چې دا پېښې کمارزښته وښیي.
د امریکايي رسنیو د راپورونو له مخې، ټرمپ له انبيسي نیوز سره په لنډه ټیلیفوني مرکه کې ویلي، چې د یوې امریکايي جټ الوتکې نسکورېدل به له ایران سره پر مذاکراتو؛ هغه مذاکرات چې د امریکا له لوري یې د پیل ادعاوې کېږي، هېڅ اغېز ونه لري. هغه په دې اړه د یوې پوښتنې په ځواب کې زیاته کړې: «نه، هېڅکله نه. دا جګړه ده. موږ په جګړه کې یو.»
د امریکا ولسمشر همداراز په ایران کې د احتمالي پیلوټ د لټون او ژغورنې د عملیاتو په اړه له جزیاتو ورکولو ډډه وکړه او یوازې په عمومي څرګندونو یې بسنه وکړه.
دا په داسې حال کې ده چې تر دې مخکې د پرمختللو جنګي الوتکو لکه F-35 او A-10 د نسکورېدو او همدارنګه د ایران د هوايي دفاع سیستم لهخوا د دوو پوځي چورلکو د ویشتلو راپورونه خپاره شوي وو.
خو سره له دې، د امریکا رسمي چارواکو تر اوسه د دې پېښو په اړه کره جزیات نه دي خپاره کړي او یوازې د دوو الوتکو د نسکورېدو پخلی یې کړی دی.