د ایران او امریکا ترمنځ د جګړې له درېدو څلور ورځې وروسته، د ایران د سپاه پاسداران د هوايي ځواکونو قوماندان ویلي، چې د امریکا د «یرغلګر او ماشوموژونکي» پوځ د تېریو په ځواب کې یې په اردن کې د امریکا هوايي اډه او د دغه هېواد د مرکزي قوماندانۍ مرکز د څو بالستیک توغندیو په وسیله په نښه کړي دي.
سید مجید موسوي زیاته کړې، تر هغو چې د ایران پر وړاندې ګواښونه او زموږ د ګټو پر ضد غیرقانوني او دښمنانه کړنې روانې وي، مقاومت به هم دوام ولري.
«د امریکا د یرغلګر او ماشوموژونکي پوځ د تېریو په ځواب کې، څو شېبې وړاندې د سپاه هوايي ځواکونو زړورو جنګیالیو په اردن کې د امریکا هوايي اډه او د دغه هېواد د مرکزي قوماندانۍ مرکز د بالستیک توغندیو په وسیله په نښه کړل».
په ورته وخت کې، د امریکا مرکزي قوماندانۍ (سنټکام) منلې چې ایران په سیمه کې پر امریکايي ځواکونو توغندیز بریدونه کړي او زیاته کړې یې ده، چې توغول شوي توغندي د دوی له لوري شنډ شوي دي.
سنټکام په یوه بله خبرپاڼه کې بیا اعلان کړی، چې نن سهار امریکايي او د سعودي عربستان جنګي الوتکو په ګډه، په عراق کې د ایرانپلوه وسلهوالو مرکزونه په نښه کړي دي. په خبرپاڼه کې راغلي، چې دا بریدونه په تېرو ۷۲ ساعتونو کې د عراق له خاورې د سعودي عربستان د انرژۍ پر تاسیساتو د بریدونو په غبرګون کې شوي دي.
«امریکايي او سعودي جنګي الوتکو د عراق په ختیځ کې د دغو وسلهوالو لوجیستیکي مرکزونه او د وسلو زېرمې په نښه کړې. دا بریدونه په تېرو ۷۲ ساعتونو کې د ایران اسلامي انقلاب ځواکونو له ملاتړه د برخمنو ډلو له لوري د څه باندې ۳۰ بېپیلوټه بریدونو په ځواب کې ترسره شول».
د امریکا او سعودي عربستان دې بریدونو ته د عراق حشد الشعبي ځواکونو د عراق د ځمکنۍ بشپړتیا ښکاره نقض بللی دی. دوی په یوه خبرپاڼه کې زیاته کړې، چې په دې بریدونو کې ۸ کسان وژل شوي او څلور نور ټپیان دي.
«موږ دا بریدونه خورا خطرناک تاوتریخوالی، د عراق د ځمکنۍ بشپړتیا ښکاره نقض او د هېواد د رسمي امنیتي بنسټونو په نښه کول بولو. اړوندې ادارې د وضعیت ارزونه کوي او د زیانونو او دقیقو شمېرو راټولول لا هم روان دي».
اخوا بیا، په سیمه کې د کړکېچونو له زیاتېدو سره هممهاله، ډونالډ ټرمپ په سپینه ماڼۍ کې د اسراییلو له لومړي وزیر بنیامین نتانیاهو سره لیدلي او ویلي یې دي، چې په دې لیدنه کې یې پر مهمو مسایلو خبرې کړې دي.
ورته مهال، د اسراییلو لومړي وزیر بیا له ټرمپ سره تر لیدنې وروسته، رسنیو سره خبرو کې ویلي، چې دا لیدنه د ګډ هدف پر درک ولاړه وه؛ هغه هدف چې ایران باید هېڅکله اټومي وسلې ترلاسه نه کړي.
«ما همدا اوس له ولسمشر ټرمپ سره یوه ډېره غوره لیدنه پای ته ورسوله. کله چې وایم غوره، دا یوازې تشه ستاینه نه ده. دا داسې خبرې اترې وې چې بشپړه همغږي، متقابل ملاتړ او د ګډ هدف پر درک ولاړې وې؛ هغه هدف چې ایران باید هېڅکله اټومي وسلې ترلاسه نه کړي».
د ایران او امریکا ترمنځ د ترینګلتیاوو او په سیمه کې د کړکېچ له بیا زیاتېدو سره هممهاله، د اوکراین د بهرنیو چارو وزیر اندري سیبیها له خپل ایراني سیال عباس عراقچي سره په ټیلیفوني خبرو کې، تهران ته ډاډ ورکړی چې د خزر په سمندر کې پر ایراني سوداګریزې بېړۍ برید قصدي نه و او کیف د کړکېچ د پراخېدو اراده نه لري.