کابل؛ افاق خبري اژانس: ننګرهار کې د خاتم الانبیاء د شکرې د کنټرول او درملنې مرکز لخوا، د شکرې ناروغۍ نړيوالې ورځې په مناسب د عامه پوهاوي غونډه جوړه شوې، چې پهکې د دغې ناروغۍ د کنټرول او مخنیوي په اړه معلومات وړاندې شوي دی.
د دغه مرکز د مسوولینو په وینا، په تېرو دوه کالونو کې له ۲۸ زرو زیاتو ناروغانو دغه مرکز ته مراجع کړې او له پاکستانه په جبر راستانه شویو کډوالو او له بېلابېلو ولایتونو د خلکو راتګ او یو شمېر نورو لاملونو له امله د شکرې ناروغي لس سلنه زیاته شوې ده.
د ننګرهار د عامې روغتیا ریاست مسوولین بیا د دغه مرکز د پراخوالي، او د شکرې ناروغۍ په اړه د عامه پوهاوي د بېلابېلو پروګرامونو د پلي کېدو ډاډ ورکوي.
په دغه غونډه کې د ایران جنرل قونسل مجید رضا پناه، بیا له دغه مرکز د سره د هر اړخیزه مرستې ډاډ ورکړ او زیاته کړې یې ده، چې روغتیاپالانو ته به د روزنیزو حضوري او انلاین زده کړو برخه کې همکاري وکړي.
دعه مرکز ته راغلي ناروغان بیا له درملنې خوښ دي او د ناروغانو زیاتوالي ته په کتو د شکرې ناروغۍ د مرکز د لا پراختیا او درملو د ورکړې غوښتنه کوي.
د شکرې دغه مرکز له نن څخه کابو دری کاله وړاندې د ایران په مالي مرسته جوړ شوی دی.
شکره یو ډول میټابولیکه (د هضم او جذب) ناروغي ده، چې په کې د وینې د شکر (ګلوکوز) کچه له عادي حده لوړېږي. دا حالت هغه وخت رامنځته کېږي چې بدن یا کافي انسولین نه تولیدوي، یا تولید شوي انسولین په سمه توګه نه شي کارولی.