کابل؛ افاق خبري اژانس: د فرانسې خبري اژانس د راپور له مخې، حوثي ځواکونو د یمن د لحج ولایت د دوو ولسوالیو له نیولو وروسته په عدن ښار کې د حکومت موقتي مرکز ۶۰ کیلومترۍ ته پرمختګ کړی دی.
د راپور له مخې، د عدن د دفاع لپاره ګمارل شويو حکومتي ځواکونو خپلې پوستې پیاوړې کړې او د باب المندب تنګي ته څېرمه، سیمو یې خپل یو شمېر ځواکونه ښار ته لېږدولي دي. حوثيانو هم په تخلیه شویو سیمو کې د خپلو ځواکونو د ځای پر ځای کولو خبر ورکړی دی.
دا په داسې حال کې ده، چې د سره سمندرګي په سواحلو کې د حوثيانو پرمختګ، باب المندب تنګي ته نږدې سیمو باندې کنټرول پراخ کړی؛ هغه لاره چې د اسیا او اروپا ترمنځ د نړۍ د سوداګرۍ لپاره مهمه ده.
