آفاق خبري آژانس؛ کابل: د بشري حقونو له نړیوالې ورځې سره هم مهاله، پاکستان په تازه اقدام کې په خیبر پښتونخوا ایالت کې د افغان کډوالو درې پنډغالي په ناڅاپي توګه تړلي دي.
د ځینې هندي رسنیو په راپور کې راغلي چې په دغو پنډغالو کې برېښنا پرې شوې، روغتیایي مرکزونه او ښوونځي تړل شوي دي.
دا کمپونه چې له دریو لسیزو راهیسې د شاوخوا ۶۵ زره افغان کډوالو کوربه وو بلاخره د افغانستان او پاکستان ترمنځ د ترینګلتیاوو د زیاتېدو په لړ کې وتړل شول.
د کډوالو د حقونو فعال محمد خان طالبي محمدزی وايي:«افغانستان د یو بل بشري ناورین په درشل کې دی؛ هغه ناورین چې د غیر پلان شویو راستنیدو او د اوسني حکومت سره له همغږۍ پرته به ژور شي. په حقیقت کې، دا ویل کیدی شي هغه هیوادونه چې د کډوالو کوربه توب کوي باید د افغانستان او نړیوالو ادارو سره له همغږۍ پرته د افغان کډوالو له ډله ییز ایستلو ډډه وکړي.»
له پاکستانه د افغان کډوالو د را ایستلو له پراخې څپې سره هم مهاله، د کور او ښار جوړولو وزارت د هېواد په ۲۹ ولایتونو کې د ۶۰ استوګنیزو ښارګوټو له طرحې خبر ورکوي.
د یاد وزارت د ویاند په وینا، په ځینو ولایتونو کې د عامه خدماتو د جوړولو چارې پیل شوې دي.
نوموړی زیاتوي چې د راستنیدونکو لپاره د کورنۍ د غړو د شمیر پر بنسټ له ۵ تر ۱۵ بسوې ځمکه په پام کې نیول شوې ده.
د کور او ښار جوړولو وزارت ویاند کمال افغان وایي:« د دایمي استوګنې په پروسه کې، اړونده کمیټې د کور او ښار جوړونې وزارت په همکارۍ، په ۲۹ ولایتونو کې د راستنیدونکو کډوالو لپاره د ۶۰ ښارګوټو لپاره پخواني او اوسني پلانونه او نقشې ډیزاین، تنظیم او چمتو کړي دي. دا پلانونه د ښاري پراختیا وزارت د محترم وزیر الحاج مولوي نجیب الله حیات حقاني له لوري تصویب شوي او په عملي توګه ولایتونو ته لیږل شوي دي ترڅو په سیمه کې پلي شي.»
په ورته مهال، د کډوالو د حقونو ځینې فعالان، په پاکستان کې د کډوالو د خراب وضعیت او د ژمي موسم له راسېدو سره ټینګار کوي چې اسلامي امارت باید ژر تر ژره راستنیدونکو ته دایمي استوګنځایونه، د کار زمینه او زده کړو ته لاسرسی برابر کړي.
د کډوالو د حقونو فعال نظر نظري وايي:« د افغانستان اسلامي امارت څخه تمه کیږي چې د بشري ناورین د مخنیوي لپاره د سرپناه برابرولو، دندو رامنځته کولو او د ژمنیو مرستو ویشلو لپاره سمدستي، منظم او اغیزناک اقدامات وکړي.»
د کډوالو او راستنیدونکو چارو وزارت د معلوماتو له مخې، د روان کال په لیندۍ میاشت کې له ایران، پاکستان او ترکیې څخه ۱۴۶ زره او ۱۵۲ افغانان هېواد ته راستانه شوي دي.