آفاق خبري آژانس؛ کابل: د صنعت او سوداګرۍ وزارت وایي، چې د ۲۰۲۵ او ۲۰۲۶ کلونو لپاره د افغانستان او ازبکستان ترمنځ د «ګډ عمل برنامې» د وروستي کېدو په پار بین الوزارتي مشورتي ناسته شوې ده.
په دې ناسته کې، له ازبکستانه د رالېږل شویو موضوعاتو په اړه، چې د سوداګرۍ په برخه کې اسانتیاوو برابرولو او همداراز د صنعت، کرنې او ترانسپورت په برخو کې د همکاریو په اړه بحث او خبرې شوې دي.
د صنعت او سوداګرۍ وزارت ویاند آخندزاده عبدالسلام جواد په دې اړه زیاتوي: «په دې غونډه کې د ازبکستان له لوري د سوداګرۍ اسانتیا، صنعتي او کرنیزې همکارۍ، ترانسپورت، لوژستیک او ظرفیت لوړولو په برخو کې اړوندو مسایلو خبرې وشوې.»
د ښاغلي عبدالسلام جواد په خبره، په دې ناسته کې د متقابلې سوداګرۍ او پانګونې هوکړې په اړه او همداراز د ګډو خونو جوړولو او په پولو کې د لېږد را لېږد ظرفیت لوړوالو په اړه هم خبرې کړې دي.
د صنعت او سوداګرۍ وزارت ویاند همداراز زیاته کړه: « د سوداګرۍ د اسانتیا په برخه کې، د سوداګریزو خونو د جوړولو، هڅولو او ملاتړ او همداراز د پولې د تیریدو ظرفیت لوړولو لپاره د یوې هوکړې په اړه بحث وشو.»
له دې سره هممهاله، د اقتصادي چارو یو شمېر شنونکي ازبکستان د هېواد د اقتصادي ودې لپاره مهم هېواد بولي، خو ټینګار کوي چې په کور د ننه پانګونه کولی شي د افغانستان او سیمې هېوادونو اقتصادي اړیکې لا پراخې کړي.
د اقتصادي چارو شنونکي عیسی مبارز په دې اړه آفاق خبري آژانس ته وویل: «دا به غوره وي چې ازبکستان راشي او دا پانګونه په افغانستان کې، په اقتصادي او کرنې په سکتورونو کې وکړي او په دې سره به خلک پر ځان بسیا شي.»
د ویلو ده، چې په دې ناسته کې د هېواد د کرنې پراختیا، د لابراتوارونو جوړولو، په کندوز او بلخ ولایتونو کې د پستې، بادامو او مڼو بڼونو کېنولو په اړه خبرې شوې او ټینګار شوی، چې د دواړو هېوادونو کمېټې به په دې برخه کې عملي کار پیل کړي.
