آفاق خبري آژانس؛ کابل: د ننګرهار د والي ویاند احسانالله عثماني وایي، چې دغه ولایت کې د سېلابونو راتلو له امله، پنځه تنه مړه او ۱۵ نور ټپیان شوي دي. د ښاغلي عثماني په خبره، دا سېلابونه چې په روداتو، هسکهمېنه او چپرهار ولسوالیو کې راغلي، زرګونه جریبه کرنیزه ځمکه، سړکونه او ځینې سربندونه یې هم ویجاړ کړي دي.
احسانالله عثماني آفاق خبري آژانس سره خبرو کې وایي: «له بده مرغه تېره شپه د ننګرهار په روداتو، هسکهمېنه او چپرهار ولسوالیو کې سیلابونه راوتلي وو، چې په پایله کې یې پنځه تنه شهیدان شوي او ۱۵ نور ټپیان دي.»
په ورته وخت کې، د ننګرهار یو شمېر اوسېدونکي دغه ولایت کې د سېلابونو راتلو ته په اشارې سره وایي، چې اړتیا ده طبیعي سرچینې په سمه توګه مدیریت، سربندونه جوړ او همداراز خلکو ته د خبرداري ورکړې پرمختللی سیسم فعال شي.
دوی ټینګار کوي، چې دولت او مرستندویه بنسټونه باید د طبیعي پېښو له امله د اوښتو خساراتو او تلفاتو د مخنیوي په پار، له وړاندې چمتووالی ولري او همداراز د زیانمنو کورنیو د لاسنیوي په موخه، ګډ کار وکړي.
د سیمې اوسېدونکی الفتالله محبزی د دې سیلابونو په اړه آفاق خبري آژانس سره خبرو کې وایي: «له حکومت او مرستندویه بنسټونو مو غوښتنه دا ده، څو د هغو کورنیو لاسنیوی وکړي، چې د سېلابونو له امله زیانونه ورته اوښتي دي.»
ننګرهار د جغرافیایي موقعیت او طبیعي جوړښت له امله، د اقلیمي بدلونونو پر وړاندې تر ډېره اغېزمن ولایت دی. وروستیو کلونو کې د ځنګلونو کمښت او د سېلابي اوبو مهارولو په پار د تاسیساتو نشتون هغه څه دي، چې له امله یې دغه ولایت کې تر ډېره خلکو ته زیانونه اوړي. اسلامي امارت تر دې وړاندې ویلي وو، چې د طبیعي بحرانونو مهارول یې، په کاري لومړیتوبونو کې قرار لري.