آفاق خبري آژانس؛ کابل: د امارتي ادارو د یو کلنو لاسته راوړنو تشریح پروګرام په لړ کې، دا ځل د عامې روغتیا وزارت مسوولینو د خپلو یو کلنو لاسته راوړنو په اړه ملت ته معلومات وړاندې کړل. د دغه وزارت سرپرست نور جلال جلالي وایي، چې د روغتیا ملي پالیسي د راتلونکو پنځو کلونو لپاره تصویب شوې ده.
ښاغلی جلالي زیاتوي، چې د هېواد په ۳۱۸ ولسوالیو کې د عمومي روغتونونو جوړولو لپاره بودجه تصویب شوې او په خبره یې په ۲۰۲ روغتیایي مرکزونو کې د خدمتونو کچه لوړه شوې ده. د عامې روغتیا وزارت سرپرست زیاتوي، چې تېر کال ۳۵۰۰ خصوصي روغتیایي مرکزونه ثبت، له کورنیو او بهرنیو بنسټونو سره د همکاریو سلګونه تړونونه لاسلیک او د روغتیایي مرستو لسګونه جوپې ترلاسه شوې دي.
د عامې روغتیا وزارت سرپرست په دې پروګرام کې همداراز هېواد کې د شفافو روغتیایي خدمتونو پر وړاندې کولو ټینګار کړی او زیاته کړې یې ده، چې د روغتیا په برخه کې د نړۍوال بانک له لوري تمویلېدونکې برنامې به د ۲۰۲۶ کال تر وروستیو دوام ولري. نور جلال جلالي زیاتوي: «عامې روغتیا وزارت د رڼو روغتیایي خدمتونو وړاندې کولو ته ژمن دی، موږ له خپلو بهرنیو همکارانو او ملاتړو مننه کوو. کومې برنامې چې د نړۍوال بانک له لوري تمویلېږي، د ۲۰۲۶ کال تر وروستیو به دوام ولري.»
له دې سره هممهاله د عامې روغتیا وزارت مالي او اداري مرستیال بختالرحمان شرافت وایي، چې دا مهال په ټول هېواد کې ۴ زره او ۲۸۹ روغتیایي مرکزونه فعال دي، چې له دې ډلې ۴۴۲ یې جامع، یو زره او ۶۴ یې اساسي، ۳۵ تخصصي او ۸ حوزوي روغتونونه دي.
هغه همداراز زیاته کړې، چې د تېر کال په لړ کې ۶ زره او ۳۶۷ مسلکي او کارکوونکو ته د کار زمینه برابره شوې ده. د بختالرحمن شرافت په خبره: «تېر کال په مرکز او ولایتونو کې نږدې ۶ زره او ۳۶۷ مسلکي کارکوونکو ته ته د کار زمینه برابره شوې او د آزادې سیالۍ له لوري ګومارل شوي دي.»
د امارتي ادارو د لاسته راوړنو په دې پروګرام کې د عامې روغتیا وزارت د پلان او پالیسۍ عمومي رییس وایي، چې د هېواد په څلورو ولایتونو کې د سرطاني ناروغیو درملنې څلور ۵۰ بستریز مرکزونه جوړ شوي دي. سید رسول منگل زیاتوي: «د هېواد په څلورو ولیتونو کې څلور ۵۰ بستریز مرکزونه جوړ شوي دي.»
په ورته وخت کې، د دغه وزارت د روغتیایي خدمتونو وړاندې کولو مرستیال بیا په خپلو خبرو کې وایي، چې تېر کال د روغتیایي کارکوونکو له لوري پر خوارځواکۍ اخته ۲.۲ میلیونه ماشومانو او ښځو درملنه شوې ده.عبدالولي حقاني زیاتوي: «تېر کال نږدې ۲.۲ میلیونه خوارځواکه میندې او ماشومان د دغه وزارت د مسوولینو له لوري تداوي شوي دي.»
په دې پروګرام کې د عامې روغتیا وزارت د روغتیایي محصولاتو او درملو چارو د تنظیم عمومي رییس هم زیاتوي، چې تېر کال یو زره او ۷۷ ټنه بېکیفیته او تاریخ تېره درمل او خوراکي توکي د دغه وزارت له لوري له منځه وړل شوي او زیاته یې کړه، چې تېر کال د ۱۴۹ میلیونه ډالرو په ارزښت ۵ زره او ۵۲۹ صحي توکي هېواد ته وارد شوي دي.
د روغتیایي محصولاتو او درملو عمومي رییس نعیمالله ایوبي په دې پورګرام کې زیاته کړه: «تېر کال یو زره او ۷۷ ټنه تاریخ تېره او بېکیفیته درمل او خوراکي توکي د دغه وزارت له لوري له منځه وړل شوي دي او همداراز ۵ زره او ۵۲۹ قلمه لوازم د ۱۴۹ میلیونه ډالرو په ارزښت هېواد ته وارد شوي.»
د عامې روغتیا وزارت مسوولینو د دغه وزارت د یو کلنو لاسته راوړنو تشریح پروګرام کې زیاته کړه، چې د تېر کال په لړ کې دغه وزارت توانېدلی ۴۶ زره او ۷۳۶ روږدو کسانو ته روغتیایي خدمتونه وړاندې کړي.