آفاق خبري آژانس؛ کابل: د افغاني سرې میاشتې ټولنې مسوولینو د دې ادارې د یو کلنو لاسته راوړنو تشریح پروګرام ویلي، چې څه باندې ۳۳۵ زره راستنېدونکو سره یې د اوبو، خوړو، نغدي مرستو، روغتیایي خدمتونو او لومړنیو توکو مرستې کړې دي. د دغه بنسټ په خبره، دې ادارې همداراز په ټول هېواد کې له ۴.۶ میلیونه کسانو سره مرسته کړې دي.
د افغاني سرې میاشتې ټولنې مرستیال عزیز الرحمن د خپلو خبرو په دوام زیاته کړې: «تېر کال د افغاني سرې میاشتې ټولنې ټولټال ۴۶۹،۱۱۷ هیوادوالو ته خواړه، غیر خوراکي توکي، نغدي پیسې، سرپناه، روغتیايي خدمات او د څښاک پاکې اوبه برابرې کړې.»
د افغاني سرې میاشتې ټولنې مسوولینو همداراز په دې پروګرام کې ویلي، چې د طبیعي پېښو له امله زیانمنو څه باندې ۵۱۱ زره کسانو سره مرستې کړې دي. د دوی په خبره، په دې مرستو کې خوراکي او غیر خوراکي توکي او نغذې پیسې شاملې دي، چې ټولیز ارزښت یې څه باندې ۳۶۹ میلیونه افغانیو ته رسېږي. عزیز الرحمن د خپلو څرګندونو په دوام ویلي: «په طبیعي او غیر طبیعي پیښو کې، ۵۱،۳۵۳ قربانیانو ته خوراکي، غیر خوراکي او نغدي مرستې وېشل شوې دي.»
د افغاني سرې میاشتې عملیاتي مرستیال روحالله عبدالسلام وایي، چې څه باندې ۳ میلیونه او ۸۰۰ زره کسان په ټول هېواد کې د دې ادارې له روغتیایي خدمتونو برخمن شوي دي. د هغه په خبره، په اتو حمایتي مرکزونو کې د نږدې ۳۷ زره یتیمانو، کونډو، اړمنو او معلولینو ملاتړ شوی دی. همداراز د رواني ناروغیو درملنې په شپږو مرکزونو کې څه باندې ۲۳۰۰ ناروغانو ته روغتیایي خدمتونه وړاندې شوي او ۲۸۸ تنه له درملنې وروسته، عادي ژوند ته را ګرځېدلي دي.
روحالله عبدالسلام زیاته کړې: «په تېر کال کې ۳ میلیونه او ۸۰۳ زره او ۹۷۷ هېوادوالو ته روغتیايي خدمتونه وړاندې شوي دي. همدارنګه د واکسینو څلور مرکزونه، ۴۷ کلینیکونه، ۱۴۶ ګرځنده ټیمونه، او څه باندې ۵۳،۰۰۰ روغتیايي کمپونه، په کندهار کې د جامع کمپلیکس او په پلازمینه کې د روغتیايي مرکزونو په ګډون، په فعاله توګه خلکو ته خدمات وړاندې کوي.»
د افغاني سرې میاشتې ټولنې مسوولینو په دې پروګرام کې زیاته کړې، چې دوه زره هغه ماشومان، چې له زېږون سره سم د زړه په ناروغۍ اخته وو، د درملنې په موخه روغتیایي مرکزونو ته ورپېژندلي دي.