آفاق خبري آژانس؛ کابل: د پاکستان د لومړي وزیر مرستیال او د بهرنیو چارو وزیر اسحاق ډار پر ننګرهار او خوست ولایتونو د پاکستان د هوایي بریدونو په اړه له نظر څرګندولو ډډه وکړه. ښاغلي ډار تیره ورځ په اسلام اباد کې یوې خبري غونډه کې د افغانستان پر خاوره د پاکستان د هوایي بریدونو ته له مستقیمې اشارې پرته وویل چې کابل کې یې سفیر احضار شوی او نوموړی د یادې پېښې د څیړلو په حال کې دی.
اسحاق ډار په دې خبري غونډه کې زیاته کړې: «زه تازه راستون شوی یم او سیسټم به بیا وڅیړم، په کابل کې زموږ سفیر له هغه وروسته احضار شوی چې له هغوی سره یې لیدنه درلوده، دا موضوع یوه عادي او ورځنۍ چاره ده او موږ هم په ځلونو د هغوي استازي احضار کړي دي، اوس ډیره ژر ده چې په دې پریکنده نظر ورکړو، اصلي مسله دا ده چې څیړنې وشي، زه په تیرو ۲۴ ساعتونو کې ډیر بوخت وم، اړوند راپور راته رسېدلی دی او باید وڅیړل شي، خو اندېښنه نشته.»
اسحاق ډار د خپلو څرګندونو په یوه برخه کې ویلي، په کابل کې په وروستیو کې د اسلامي امارت له چارواکو سره دوه اړخیزه غونډه کې، اسلام اباد یو ځل بیا د پاکستاني طالبانو د غړو د ورسپارلو غوښتنه کړې ده. نوموړي په دې ناسته کې ټینګار وکړ چې د امنیت او له ترهګرو ډلو سره د مبارزې په برخه کې د دواړو هېوادونو همکاري د سیمې د ټیکاو لپاره اړینه ده او پاکستان تمه لري چې اسلامي امارت په دې برخه کې لازم اقدامات وکړي.
د پاکستان مرستیال لومړی وزیر او د بهرنیو چارو وزیر د خپلو خبرو په دوام ویلي: «په دوه اړخیزه ناسته کې کله چې د پاکستاني طالبانو ټي ټي پي موضوع یاده شوه، چارواکو وویل: موږ تمه لرو چې ټي ټي پي ستاسو له خاورې زموږ پر وړاندې ګټه پورته نه کړي، کولی شي هغوي کنټرول کړئ، هغوي خپلو پولو ته وشړئ، یاد د امکان په صورت کې موږ ته یې را وسپارئ، له دې سره ټینګار وشو چې د دې هېواد همکاري او ټیکاو زموږ لپاره حیاتي دی.»
خو پوښتنه دا ده چې ولې پاکستان په ځلونو داسې ادعاګانې مطرح کوي او هڅه کوي افغانستان په خپله خاروه کې د نا امنۍ او بې ثباتۍ مسوول وګڼي؟
د سیاسي چارو شنونکی سلیم پیګیر بیا د پاکستاني چارواکو د چوپتیا په اړه داسې لیدلوری لري: «پاکستاني ځواکونو په تیرو ۷۸ کلونو کې پر پښتونو او بلوڅانو ظلمونه کړي او ځپلي یې دي، هغوی اوس له خپلو کورنیو اقتصادي، سیاسي او ټولنیزو ستونزو سره دا فشار او ځپل افغانانو ته رالیږدوي، افغانان د پاکستان په نا امنۍ او بې ثباتۍ کې رول نه لري، دغه هېواد تل هڅه کړې چې د خپل بام واورې پر افغانستان را واچوي.»
دا په داسې حال کې ده چې پاکستاني بې پیلوټه الوتکو د چهارشنبې په شپه ناوخته پر خوست او ننګرهار ولایتونو بریدونه وکړل چې په ټوله کې د درې ماشومانو د وژل کېدو او ۶ نورو د ټپي کېدو لامل شول. دا بریدونه له پراخو غبرګونونو سره مل وو او اسلامي امارت د پاکستان دا کړنه له نړیوالو قوانینو څخه سرغړونه وبلله.