آفاق خبري آژانس؛ کابل: د ازبیکستان ولسمشر شوکت میرضیایوف د دغه هېواد د خپلواکۍ د ۳۴ کالیزې د نمانځنې مراسمو کې، افغانستان د سیمې او نړۍ د امنیت یو مهم عامل یاد کړ. ښاغلي میرضیایوف په دې مراسمو کې له کابل سره د عملي او رغنده همکاریو پر اړتیا ټینګار وکړ. د ازبیکستان ولسمشر همداراز زیاته کړې: «افغانستان د سیمې او نړۍ په امنیت کې مهم رول لري او له همدې امله، د دغه هېواد له دولت سره عملي او رغنده تعامل مهم دی.»
په ورته مهال، د سیاسي چارو ځينې شنونکي په دې اند دي چې ازبیکستان د افغانستان پراختیا او پرمختګ ته ځانګړی اهمیت ورکوي او په مقابل کې، د ازبیکستان لپاره د افغانستان پر رول هم سترګې نشي پټیدی. د دوی په باور، د کابل او تاشکند ترمنځ دوه اړخیزې اړیکې کولی شي د دواړو هېوادونو ګټې خوندي کړي.
د سیاسي چارو شنونکی اسد الله ندیم د شوکت میرضیایوف د دې څرګندونو په اړه آفاق خبري آژانس سره خبرو کې وایي: «د افغانستان د پراختیا او پرمختګ لپاره ازبیکستان یو ډیر مهم هېواد دی او د ازبیکستان لپاره هم د افغانستان اهمیت له پامه نه غورځول کیږي. د دواړو هېوادونو ترمنځ دوه اړخیزې اړیکې د دواړو هېوادونو په ګټه دي، ازبیکستان د سوداګرۍ، ټرانزیټ او ټرانسپورټ په برخو کې مهم رول لري او که دا اړیکې پراخې شي، افغانستان به هم د ودې او پراختیا پر لور ګام پورته کړي.»
د سیاسي چارو بل شنونکی سید هارون هاشمي بیا په دې اړه داسې لیدلوری لري: «مرکزي آسیا، په ځانګړي ډول ازبکستان په اقتصادي او امنیتي برخو کې افغانستان سره پراخې اړیکې لري. ازبکستان هڅه کوي چې افغانستان سره همکاري او مرسته وکړي، د انرژۍ او برېښنا پروژې عملي کړي، ټرانزیټ او سوداګري پراخه او امنیتي اندېښنې را کمې کړي.»
دا په داسې حال کې ده چې ازبیکستان په افغانستان کې تر وروستیو بدلونونو وروسته، له اسلامي امارت سره نږدې اړیکې ساتلې دي. تاشکند جیوپولیتیک موقعیت ته په پام هڅه کوي د منځنۍ اسیا بازارونو ته د لاسرسي او لویو ټرانزیټي پروژو د پراختیا لپاره له دې لارې ګټه پورته کړي.