آفاق خبري آژانس؛ کابل: د اسلامي امارت دفاع وزارت پر خوست او ننګرهار د پاکستان هوایي بریدونه، چې په ترڅ کې یې ښځې او ماشومان وژل شوي، په کلکو ټکو غندلي دي. د دفاع وزارت په خبرپاڼه کې راغلي، چې دا ډول ظالمانه او وحشیانه اقدامات د هېڅ لوري په ګټه نه دي، بلکې د دواړو مسلمانو ملتونو ترمنځ فاصلې او نفرتونه زیاتوي. د اسلامي امارت دفاع وزارت همداراز ټینګار کړی، چې دا ډول غیر مسوولانه کړنې به ناوړه عواقب ولري.
د دفاع وزارت د خبرپاڼې په یوه برخه کې راغلي: «د افغانستان په خاوره د پاکستاني الوتکو برید چې د ملکي خلکو ښځو او ماشومانو د شهادت سبب شو په کلکه غندو. داسې د ظلم او وحشت څخه ډک اقدامات د هیچا په ګټه نه دي؛ بلکې د دواړو مسلمانو ملکونو د خلکو ترمنځ د فاصلې پیداکولو او د دواړو اړخونو ترمنځ د نفرت سبب ګرځي او دغه ډول بېمسؤولیته کړنې به عواقب ولري.»
پر افغانستان د پاکستان هوایي بریدونو پراخ کورني او نړۍوال غبرګونونه هم را پارولي دي. پخواني ولسمشر حامد کرزي پر خوست او ننګرهار ولایتونو د پاکستان هوایي بریدونه غندلي او د پاکستاني پوځیانو دا کړنه یې د افغانستان د ملي حاکمیت او نړۍوالو موازینو ښکاره نقض او همداراز د ګاونډيتوب اصولو خلاف کړنه بللې ده.
پخوانی ولسمشر حامد کرزي د دې بریدونو په غبرګون کې پر خپله ایکس پاڼه لیکلي: «پاکستان په سیمه کې د خپلو ناسمو سیاستونو له عواقبو سره لاس او ګریوان دی او د افغانستان د حاکمیت نقض او د افغانستان پر خلکو برید به، پاکستان له دې عواقبو ونه ژغوري. د پاکستان خیر افغانستان سره متمدنو اړیکو لرلو، د ګاونډیتوب حقونو او د نړۍوالو مقرراتو په رعایت کې دی.»
له دې سره هممهاله، د افغانستان د سولې لپاره د امریکا پخواني ځانګړی استازي زلمي خلیلزاد او د پښتو ژغورنې غورځنګ مشر منظور احمد پښتین هم پر افغانستان د پاکستان بریدونه په کلکه غندلي دي. ښاغلي زلمی خلیلزاد د دې بریدونو په اړه پر خپله ایکس پاڼه لیکلي: «زه د افغانستان په ختیځ کې پر ملکي وګړو د پاکستاني بېپیلوته الوتکو بریدونه په کلکو ټکو غندم»
اخوا بیا د پښتون ژغورنې غورځنګ مشر منظوراحمد پښتین هم د پاکستاني پوځ د دې بریدونو په اړه سخت غبرګون ښودلی دی. ښاغلي پښتین پر خپله فیسبوک پاڼه لیکلي: «د یو آزاد هېواد په توګه باید د افغانانو وینه، اوښکې او ابرو دومره اسانه نه وي چې هره ورځ د کډوالو په نوم یې په کورونو ورننوځي، په زور یې وشړي، او بیا په خپل خوست او ننګرهار کې هم په بمونو ماشومان ورته شهیدان کړي او کورونه یې وران کړي.»
بلخوا د پاکستاني طالبانو تحریک (ټيټيپي) پر افغانستان د پاکستان بریدونه د دغه هېواد د ملي حاکمیت نقض او ظالمانه عمل بللی دی. د پاکستاني طالبانو تحریک په دې بریدونو کې د دوی د پټنځای په تړاو راپورونه بېبنسټه بللي او زیاته کړې یې ده، چې د دې ډلې رهبري او غړي په پاکستان کې حضور لري.
د سیاسي چارو شنونکی محمد یاسین حبیب په دې اړه آفاق خبري آژانس سره خبرو کې وایي: «د ټيټيپي ځواکونه په افغانستان کې هېڅ شتون نه لري، پاکستاني ځواکونو په دې بریدونو کې د عامو او بېګناه خلکو کورونه بمبار کړي دي.»
دا په داسې حال کې ده، چې د اسلامي امارت بهرنیو چارو وزارت پر ننګرهار او خوست ولایتونو د پاکستاني پوځ د بریدونو په غبرګون کې، کابل کې د پاکستان سفیر احضار او د افغانستان احتجاجلیک یې ورته وسپاره.
بهرنیو چارو وزارت په یوه خبرپاڼه کې د پاکستاني پوځ له خوا د افغانستان هوايي حریم نقض او ډیورنډ فرضي کرښې ته څېرمه پر ولسي وګړو بمباري د افغانستان د ځمکنۍ بشپړتیا ښکاره نقض او او د افغانستان حریم یې د اسلامي امارت لپاره سور خط بللی دی.