آفاق خبري آژانس؛ کابل: لانګ وار ژورنال وېبپاڼې په یوه تحلیل کې ویلي، چې د ډونالډ ټرمپ دولت لا هم سرپرست حکومت سره د تعامل سیاست غوره بولي؛ هغه تګلاره چې په نتیجه کې یې تر دې وړاندې د دوحې تړون ترلاسه شو. د دې تحلیل پر بنسټ، د کورنیو چارو وزارت سرپرست سراج الدین حقاني پر سر د ۱۰ میلیونه ډالرو نغدي جایزې لغوه کول او د افغانستان ډیپلوماسۍ ډګر ته د زلمي خلیلزاد بېرته راستنېدل، د دغه سیاست د دوام نښې نښانې دي.
لانګ وار ژورنال وېبپاڼې د دې تحلیل په یوه برخه زیاته کړې: «داسې انګېرل کېږي، چې د ټرمپ حکومت د تېر سیاست په څېر له طالبانو سره تعامل ته دوام ورکوي. هغه سیاست چې په پایله کې یې په ۲۰۲۰ زېږدیز کال کې د دوحې تړون ترلاسه شو او په ۲۰۲۱ کال کې یې له افغانستانه د امریکایي ځواکونو وتلو ته زمینه برابره کړه. تېره اونۍ د امریکا بهرنیو چارو وزارت د سراج الدین حقاني پر سر ټاکلې لس میلیونه نغدي جایزه لغوه کړه. پر دې سربېره، د افغانستان لپاره د امریکا پخوانی سفیر زلمی خلیلزاد او د دوحې تړون اصلي لوبغاړی بېرته د افغانستان د سیاست صحنې ته راستون شو.»
د نړۍوالو اړیکو شنونکی نجیب الرحمان شمال په دې اړه آفاق خبري آژانس ته وویل: «زلمي خلیلزاد چې د امریکا په استازولۍ یې د دوحې تړون لاسلیک کړی و، وروستیو کلونو کې یې وخت ناوخته سرپرست حکومت د دې تړون پر نه عملي کولو تورناوه. ښایي هغه وکولی شي، د دې هوکړې د بشپړ تطبیق په موخه یو ځل بیا را مخکې شي او دا تړون په بشپړ ډول عملي کړي.»
له دې سره هممهاله، سيانان خبري شبکې په یوه تحلیلي راپور کې ویلي، چې د اسلامي امارت چارواکو له امریکایي پلاوي سره وروستۍ لیدنه کې د سرپرست حکومت د رسمیت پېژندنې غوښتنه کړې ده.
په دې راپور کې راغلي، چې امریکایي پلاوي د اسلامي امارت چارواکو ته ویلي، چې د اړیکو پراختیا په موخه باید افغانستان کې ګواښونه ومني او د له منځه وړلو په پار یې فعال ګامونه اوچت کړي.
سيانان زیاته کړې، چې اسلامي امارت واک ته د ټرمپ له راګرځېدو وروسته، له متحده ایالتونو سره د اړیکو پراختیا په پار هلې ځلې چټکې کړې دي.
د سیاسي چارو شنونکی جنت فهیم چکري په دې تړاو وایي: «په افغانستان کې د امریکا د متحده ایالتونو د دروازو پرانیستل، حتا که هغه د کونسلګرۍ په کچه هم وي، د دواړو هېوادونو لپاره دا مانا لري، چې ۵۰ سلنه لار مو وهلې ده.»
اخوا د پوځي چارو شنونکی اسدالله ندیم بیا په دې اړه وایي: «ډېری اړیکې د ډيپلوماټیکو کانالونو له لارې نیول کېږي. څو چې دا اړیکې او تعامل د ډیپلوماټیک چینل له لارې ټینګې نشي، لرې ده چې واشنګټن کې دې د افغانستان سفارت سرپرست حکومت ته وسپارل شي.»
دا په داسې حال کې ده، چې تر دې وړاندې د اسلامي امارت ویاند ذبیحالله مجاهد آفاق خبري آژانس سره خبرو کې، واشنګټن کې د افغانستان سفارت د پرانیستو او همداراز کابل کې د امریکا د سفارت فعالېدو غوښتنه کړې وه.
ښاغلي مجاهد همداراز په متحده ایالتونو کې د افغانانو لپاره د قونسلي خدمتونو پر وړاندې کولو ټینګار کړی و.