سره له دې چې پاکستاني پوځ د کوچني اختر په مناسبت له شپږ ورځني اوربند سرغړونې کړې، تازه د دغه هېواد د لومړي وزیر مرستیال او بهرنیو چارو وزیر محمد اسحاقډار د مارچ د ۲۳مې (د پاکستان د ملي ورځې) په مناسبت پیغام کې اعلان ویلي، چې د ترهګرۍ پر وړاندې مبارزه د پاکستان په اجنډا کې ده او په دې چوکاټ کې په افغانستان کې عملیات توجیه کوي.
محمد اسحاقډار د خپلو څرګندونو په دوام وویل: «پاکستان د ترهګرۍ د ګواښ د له منځه وړلو لپاره په کلکه ژمن دی. پاکستان له همدې کبله د افغانستان په خاوره کې عملیات ترسره کوي.»
د کابل او اسلام آباد ترمنځ د کړکېچ په لړ کې، د منځګړیتوب هڅې هم روانې دي. په مسکو کې د پاکستان سفیر فیصل نیاز ترمذي وايي چې اسلام آباد له کابل سره په خپلو شخړو کې د روسیې منځګړیتوب غوښتی او د روسیې، چین، قطر، ترکیې او سعودي عربستان په ګډون د مختلفو هیوادونو د وړاندیزونو له غور وروسته یې د اوربند سره هوکړه کړې ده.
فیصل نیاز ترمذي په دې اړه د یوې پوښتنې په ځواب کې زیاته کړې: «هو، موږ اړیکه نیولې ده. موږ له روسیې سره په تماس کې یو او د دې ارزښتناک وړاندیز څخه منندوی یو. د روسیې، چین، قطر، ترکیې او سعودي عربستان د وړاندیزونو په پام کې نیولو سره، موږ د اوربند سره موافقه وکړه.»
په ورته وخت کې، کابل کې پر یوه روغتون د پاکستان له هوايي برید اووه ورځې وروسته، د بښنې نړیوال سازمان د یوې خپلواکې، شفافې او بې طرفه څېړنې غوښتنه کړې، څو د پیښې ابعاد روښانه شي او د حساب ورکولو لپاره یو اساس چمتو شي. د نړیوال بحران ډلې هم په یوه راپور کې خبرداری ورکړی چې د افغانستان او پاکستان ترمنځ تاوتریخوالی خطرناک پړاو ته داخل شوی او که دوام ومومي، نو کولی شي په یوه اوږده جګړه بدل شي.
په همدې حال د سیاسي چارو یو شمیر کارپوهان وايي چې د پاکستان پالیسۍ د ګاونډیتوب له اصولو، اسلامي ارزښتونو او نړیوالو قوانینو سره سمون نه لري.
د سیاسي چارو شنونکی نثار احمد شیرزی په دې اړه آفاق خبري آژانس سره خبرو کې زیاتوي: «پاکستان ژمن دی چې د لویو ننګونو په وړاندې د خپلو پلانونو او اهدافو د پرمختګ لپاره پیسې مصرف کړي او هڅه کوي چې د شته ځای په کارولو سره خپلې پالیسۍ پراخې کړي. د پاکستان لخوا رامینځته شوي کړکیچونه په افغانستان او مرکزي آسیا کې د ناامنۍ خپریدل شامل دي ترڅو دا سیمې بې ثباته کړي او د متحده ایالاتو په ګډون د لویو قدرتونو د اهدافو د ترلاسه کولو لپاره لاره هواره کړي.»
د یادونې وړ ده چې په کابل کې د روږدو کسانو د درملنې پر مرکز د پاکستان له خونړي برید وروسته، چې څه باندې ۴۰۰ کسانو ته پکې مرګژوبله واوښته، دواړو خواوو د کوچني اختر په مناسبت په لنډمهاله اوربند موافقه وکړه؛ خو اسلامي امارت اعلان کړی چې اسلام آباد د یکشنبې په ورځ له اوربند سرغړونه کړې ده.