آفاق خبري آژانس؛ کابل: د افغانستان په اړه د شانګهای همکاریو سازمان د غړو هېوادونو دوه ورځنۍ مشورتي ناسته، نن پای ته ورسېده. د دې ناستې اصلي محور د شانګهای د غړو ترمنځ د افغانستان په اړه د همغږۍ او همکارۍ پیاوړتیا، او د دغه هېواد د امنیتي، اقتصادي او بشري ستونزو ارزونه وه.
د ناستې ګډونوالو ټینګار کړی، چې د ترهګرۍ پر وړاندې مبارزه باید نوره هم پیاوړې، له اقتصادي شاتګ سره جدي مقابله او د افغانستان د روان بشري بحران د لا نازکېدو مخه ونیول شي. ګډونوالو پر دې هم هوکړه کړې، چې د یادو ستونزو د غوره مدیریت لپاره باید ګډ کار، سیمهییزه همغږي او اغېزناک میکانیزمونه رامنځته شي.
د دې مشورتي غونډې په څنډو کې؛ ایران، پاکستان، روسیې او چین هم د افغانستان په اړه جلا ناسته کړې ده. په دې ناسته کې ټینګار شوی، چې څلور واړه هېوادونه به افغانستان سره له شته ستونزو د وتلو په برخه کې همکاي کوي.
د سیاسي چارو شنونکی جنت فهیم چکري د دې غونډې په اړه آفاق خبري آژانس سره خبرو کې وایي: «هغه سیمهییزې ناستې چې په تاجکستان کې جوړېږي، کولای شي له چین سره خبرو ته زمینه برابره کړي، تر څو د افغانستان د ثبات او امنیت لپاره لازمې همکارۍ ترسره شي. ازبکستان هڅه کوي چې له همدې ناستو په ګټنې سره، د سیمهییزو حللارو په جوړولو کې فعال رول ولوبوي.»
په ورته وخت کې، د سیاسي چارو یو شمېر شنونکي د افغانستان د ثبات، امنیت او اقتصادي ودې په برخه کې د دا ډول ناستو د اهمیت او اغېزمتیا په اړه داسې لیدلوری لري: د نړیوالو اړیکو شنونکی بلال فاطمي آفاق خبري آژانس سره په دې اړه خپل لیدلوری داسې بیانوي: «دا ناستې باید یو کمیسیون یا کمیټه رامنځته کړي چې له ترهګرۍ، په ځانګړي ډول له داعش سره د مبارزې لپاره ځانګړې شوې وي. په دې کمیټه کې باید افغانستان او د سیمې هېوادونه برخه ولري او فعال رول ولوبوي. دا کمیټه باید د سپوږمکۍ څار، ځمکني کنټرول، استخباراتي، امنیتي او بشپړ دفاعي ظرفیت درلودونکې وي.»
د سیاسي چارو شنونکی سید جواد سجادي بیا په دې اړه داسې لیدلوری لري: «د افغانستان جغرافیې او موقعیت ته په کتو، دا هېواد د شانګهای د همکاریو سازمان لپاره ډېر اهمیت لري او دغه سازمان هم غواړي چې د امنیت په برخه کې له افغانستان سره همکاري ولري.»
د افغانستان وضعیت په اړه د شانګهای همکاریو سازمان مشورتي ناسته، داسې مهال د غړو هېوادونو په ګډون سره ترسره کېږي، چې تر دې وړاندې هم د سیمې ډېری هېوادونو او نړۍوالو سازمانونو د افغانستان امنیتي او بشري وضعیت په اړه ناستې کړې، خو تر اوسه یې کومه مثبته پایله نه ده ورکړې.