پاکستاني رسنیو د دغه هېواد د دفاع وزیر خواجه محمد آصف په حواله راپور ورکړی، چې نوی ډیلی په مستقیمه توګه پاکستان سره د مخامخ کېدو وړتیا نه لري، نو ځکه له افغانستانه په استفادې د اسلامآباد پر وړاندې عمل کوي. خواجه آصف یو ځل بیا تور پورې کړی چې هند د افغانستان له لارې د پاکستان پر ضد نیابتي جګړه پر مخ وړي. نوموړي د پاکستان د ملي شورا په غونډه کې ویلي چې اسلاماباد هېڅکله هم د کابل پر وړاندې تېری نه دی کړی.
پاکستانۍ ډان ورځپاڼې په یوه راپور کې د خواجه محمد آصف په حواله لیکلي: «پخوا د افغانستان حکومت د پاکستان له دریځ سره همغږی و، خو اوس د ترهګرۍ د مهارولو لپاره د هېڅ ډول تضمین ورکړې ته چمتو نه دی. دا مهال هند له افغانانو په استفادې زموږ پر ضد کار اخلي او په پاکستان کې نیابتي جګړه پر مخ وړي.»
د سیاسي چارو شنونکی اسدالله ندیم د خواجه محمد آصف د دې څرګندونو په اړه وایي: «د افغانستان او پاکستان په اړیکو کې اړینه ده چې دواړه لوري د سولې او متقابلې همکارۍ په اړه خپلې پالیسۍ او تګلارې له سره وارزوي، د یو بل ملي ګټو ته درناوی ولري او له هغو قومي اړخنیونو ډډه وکړي چې د مقابل لوري د ګټو پر ضد وي.»
د پاکستاني رسنیو د راپورونو پر بنسټ، خواجه محمد آصف په خپلو خبرو کې زیاته کړې چې د افغانستان په تېرو جګړو کې د پاکستان لاسوهنه «یوه تېروتنه» وه او په خبره یې، اسلاماباد ته یې ناوړه پایلې درلودې.
آصف په پارلماني غونډه کې زیاته کړې، چې د پاکستان دوه پخواني پوځي دیکتاتوران نه د اسلام لپاره، بلکې د یوه ستر زبرځواک د خوشحالولو په موخه یې ځانونه د افغانستان په جګړه کې ښکېل کړل.
د پاکستانۍ ډان ورځپاڼې د راپور په یوه بل برخه کې راغلي: «دوه پخواني پوځي دیکتاتوران نه د اسلام لپاره، بلکې د یوه زبرځواک د خوشحالولو لپاره د افغانستان جګړې ته داخل شول. موږ خپل تاریخ رد کړ، خپلې تېروتنې مو ونه منلې. ترهګري د هغو تېروتنو پایله او انعکاس دی چې پخوانیو دیکتاتورانو کړې دي.»
د سیاسي چارو شنونکی حمیدالله مفید په دې اړه آفاق سره خبرو کې زیاتوي: «سترې ترهګرې شبکې لکه القاعده، داعش او نور ورته سازمانونه هم د پاکستان په خاوره کې رامنځته شوي دي. دا وضعیت د دې لامل شوی چې نن پاکستان په خپله د امنیت په برخه کې له جدي ستونزو سره مخ شي، او د دغه بحران حل د دغه هېواد په پالیسیو کې ژورې او جدي بیاکتنې ته اړتیا لري.»
اوس پوښتنه دا ده چې پاکستان د افغانستان په اړه د دوهګوني سیاست په غوره کولو سره، کومې موخې تعقیبوي؟
د سیاسي چارو شنونکی اختر محمد راسخ د دې پوښتنې په ځواب کې وایي: «د افغانستان په اوږدمهاله کړکېچونو کې د پاکستان سټراټیژیک رول باید له پامه ونه غورځول شي. اوس چې خپله پاکستان له جدي امنیتي ستونزو سره مخ دی، دا د همغو تېرو سیاستونو پایله ده، او د پاکستان دا ټول سیاستونه په خپله د اسلامآباد لپاره په یوه لویه معضله بدل شوي دي.»
دا په داسې حال کې ده، چې دوه ورځې وړاندې د پاکستان جمعیت علمای اسلام ګوند مشر مولانا فضلالرحمن، د اسلامآباد پر ناسمو تګلارو سخته نیوکه کړې وه او د پاکستاني چارواکو د هغو ادعاوو په غبرګون کې یې ویلي وو، چې دا مهال له افغانستان پاکستان ته یو انار نشي راتلی، نو څنګه ممکنه ده، چې ترهګر را تیر شي؟