آفاق خبري آژانس؛ کابل: د روانې اونۍ د (کب، ۲۵مه) ځینو امریکایي رسنیو راپور ورکړ، چې د ټرمپ دولت امریکا ته د ۴۳ هېوادونو د اوسېدونکو پر سفر محدودیتونه ارزوي، چې له ارزونې وروسته به د افغانستان په ګډون د ۱۰ هېوادونو اوسېدونکي په مطلق ډول امریکا ته له سفر کولو منع شي.
د دې راپورونو له خپرېدو وروسته، امریکا کې یو شمېر بنسټونو چې تر ډېره یې د افغانانو د لېږد او بیا مېشتېدنې مسوولیت پر غاړه درلود، اندېښنې را وپارولې او دا یې له افغانانو سره د امریکا د ژمنو خلاف کړنه یاده کړه. که څه هم دا روښانه نه وه، چې آیا په دې لیست کې به افغانستان کې د امریکا متحدین هم شامل وي کنه، خو یو شمېر ګاونډیو او د سیمې هېوادونو کې مېشت افغانان یې په اړه اندېښمن وو.
د دې راپورونو او اوازو په غبرګون کې، پرون (دوشنبه، کب ۲۷مه) ناوخته د امریکا د بهرنیو چارو وزارت ویاندې تمي بروس یوې خبري ناستې ته د وینا پر مهال دا ګنګوسې رد کړې او په خبره یې، هغه افغانان چې افغانستان کې د امریکایي ځواکونو ترڅنګ ولاړ وو، هغوی به امریکا ته ولېږدول شي.
مېرمن بروس په دې خبري ناسته کې په ډاګه کړه، چې امریکا ته د افغانانو لېږد او بیامېشتېدل د دوی د سیاست یوه مهمه برخه ده. هغې په دې تړاو وویل: «موږ پخوا هم افغانستان کې د امریکایي ځواکونو متحدینو د لېږد په اړه ترتیبات نیولي وو، هغه کسان چې له امریکایي ځواکونو سره یې همکاري کړې، زموږ د سیاست یوه مهمه برخه دي، دا بهیر د پخوانۍ ادارې “بایډن” پر مهال هم دوام درلود او موږ هم ورباندې کار کوو.»
د امریکا د بهرنیو چارو وزارت ویاندې ټینګار وکړ، چې د ډونالډ ټرمپ فرمان، یوازې د امریکا د حکومت عادي امنیتي ارزونه ده، نه د پالیسي بدلون.
دا په داسې حال کې ده، چې واک ته د ډونالډ ټرمپ له رسېدو سره سم، هغه د ناقانونه کډوالو په اړه د یوه اجرایوي فرمان په لاسلیکولو امریکا ته د افغانانو ورتګ هم وځنډاوه او ورسره سم شاوخوا ۱۶۰۰ افغانان چې د امریکا ویزې یې ترلاسه کړې وې او تمه وه، یاد هېواد ته سفر وکړي، له سفر کولو پاتې شول.
