د نړیوالو بنسټونو او سازمانونو له لوري د کابل او اسلاماباد ترمنځ د مخ پر ودې کړکېچ په اړه له پرلهپسې اندېښنو وروسته، د ملګرو ملتونو یو شمېر کارپوهانو د ترینګلتیاوو پای ته رسولو، سمدستي اوربند، او د اسلامي امارت او پاکستان ترمنځ د تلپاتې سولې د ټینګښت غوښتنه کړې ده.
هغوی ټینګار کړی چې دواړه خواوې باید دایمي اوربند ته ژمن او د شخړې بنسټیز لاملونه حل کړي. د ملګرو ملتونو کارپوهانو له دواړو خواوو غوښتي چې د نړیوال قانون درناوی وکړي او ملکي وګړو او ملکي زیربناوو ته له زیان رسولو ډډه وکړي.
د ملګرو ملتونو د شمېرو له مخې، د افغانستان او پاکستان ترمنځ د تاوتریخوالي له امله، د ۲۰۲۶ کال د فبروري له ۲۶مې راهیسې ۲۸۹ ملکي وګړو ته مرګ ژوبله اوښتې او تر ۱۱۵،۰۰۰ زیات کسان بې ځایه شوي دي.
د ملګرو ملتونو د کارپوهانو د اعلامیې په یوه برخه کې راغلي: «موږ له پاکستان او په افغانستان کې له چارواکو غوښتنه کوو چې د تلپاتې اوربند ژمنه وکړي، او د جګړې اصلي لاملونه حل کړي.»
له دې وړاندې، د افغانستان او پاکستان دیني عالمانو، سیاستوالو او ق مشرانو د دواړو هېوادونو ترمنځ د سولې رامنځته کولو او د اوربند د غځولو غوښتنه کړې وه. په یوه ګډه اعلامیه کې، هغوی له دواړو خواوو غوښتي چې د تلپاتې سولې د ترلاسه کولو په لور عملي او دوامداره ګامونه پورته کړي.
د سیاسي چارو شنونکی اسدالله ندیم په دې اړه آفاق خبري آژانس سره خبرو کې زیاتوي: «د پاکستان د دې اقدام تر شا نور هدفونه هم پټ دي؛ لکه د افغانستان پر راتلونکي د نفوذ هڅه، یا خلک دې ته اړ کول چې د دوی نظرونه واوري او ومني. که د پاکستان غوښتنې واقعي او د منلو وړ وي، نو کولای شي د خبرو اترو له لارې حل شي.»
د سیاسي چارو یو شمېر نور شنونکي بیا وایي، چې دا شخړه د پاکستان له خوا پیل شوې او له اوربند لا هم سرغړونې دوام لري. دوی په سیمه کې د ثبات لپاره د افغانستان دریځ ته په اشارې سره ټینګار کوي چې نړیواله ټولنه باید د نړیوالو قوانینو له مخې د هر هغه چا لپاره چې د یوه هیواد ملي حاکمیت نقضوي، سزا ورکړي.
د سیاسي چارو شنونکی عزیز ستانکزی په دې اړه زیاتوي: «ملګري ملتونه غواړي خپلې دندې او مسوولیتونه ترسره کړي او قوانینو ته درناوی وکړي او هر څوک چې د هېوادونو حاکمیت تر پښو لاندې کوي باید مجازات شي. زما په اند، د دواړو هېوادونو ترمنځ د باور د رامنځته کولو هڅې روانې دي، ځکه ځینې داسې پوښتنې شته چې ولې پاکستان دا جګړه پیل کړه.؟»
په داسې حال کې چې د ملګرو ملتونو کارپوهان د کابل او اسلام اباد ترمنځ د دایمي او تلپاتې اوربند په اړه خبرې کوي .د کنر ځايي چارواکو رسنیو ته ویلي چې د پاکستان ځواکونو د دې ولایت پر بېلابېلو ولسوالیو شاوخوا ۸۵ راکټونه توغولي، چې په پایله کې یې یو کس وژل شوی او شپږ نور ټپیان دي.