آفاق خبري آژانس؛ کابل: د پاکستان لومړي وزیر مرستیال او بهرنیو چارو وزیر په یوه خبري ناسته کې ویلي، چې هېواد یې هوډ درلود د افغانستان خاورې دننه پوځي چاڼیز عملیات پل کړي. د اسحاقډار په وینا، قطر د ترکیې په ملاتړ مداخله وکړه او د دواړو هېوادونو ترمنځ یې د منځګړیتوب وړاندیز وکړ؛ هغه موضوع چې د اسلاماباد له لوري د پلان شويو پوځي عملیاتو د درېدو لامل شوه.
اسحاقډار په دې غونډه کې زیاته کړې: «هغوی هره شېبه په منظم ډول ما سره اړیکه کې وو. هغوی درک کړه چې کېدای شي موږ پوځي اقدام وکړو او غوښتنه یې وکړه چې مهرباني وکړئ خپل ځواکونه ودروئ. موږ به منځګړیتوب وکړو او مرسته به وکړو.»
د کابل او اسلامآباد ترمنځ د سوداګریزو لارو له تړل کېدو ۵۱ ورځو وروسته، د پاکستان لومړي وزیر مرستیال او بهرنیو چارو وزیر اسحاقډار په دې ناسته کې اعلان وکړ چې ملګرو ملتونو له اسلاماباد غوښتي، څو د دغو لارو د تړلو پرېکړه له سره وارزوي. نوموړي زیاته کړې چې د پاکستان بهرنیو چارو وزارت دا غوښتنه په رسمي توګه ترلاسه کړې او کېدای شي هېواد یې له لوړوپوړو چارواکو سره تر سلا مشورو وروسته د افغانانو لپاره د ضروري خوراکي توکو د وارداتو اجازه ورکړي. د پاکستاني رسنیو د راپور له مخې تمه ده چې دغه لاره د بشري دلایلو له امله، نن په محدود ډول پرانیستل شي.
د پاکستان لومړي وزیر مرستیال او بهرنیو چارو وزیر د خپلو څرګندونو په دوام ویلي: «ملګرو ملتونو له موږ غوښتنه کړې چې افغانستان ته د بشري مرستو په ګډون ضروري خوراکي توکو د لېږد موضوع وڅېړو. ما د وسلهوالو ځواکونو له مشر سره خبرې کړې، خو لا مې له لومړي وزیر سره خبرې نه دي کړې. هیله لرم سبا مثبت خبرونه ولرو؛ دا مرستې به د افغانستان خلکو ته وي.»
په ورته وخت کې، د چارو یو شمېر شنونکي وایي، چې د پاکستان د بهرنیو چارو وزیر دا څرګندونې واقعي حالت نشي منعکسولی. د دوی په وینا، پاکستان له کلونو راهیسې په سیمه کې پوځي پروژې پلې کړې او د سولې خبرو لپاره جدي اراده نه لري. شنونکي خبرداری ورکوي چې د اسلاماباد امنیتي پالیسي کولای شي سیمه بېثباته کړي، ځکه دغه هېواد تل د بهرنيو قدرتونو د ګټو په رڼا کې قرار لري.
د نړۍوالو چارو شنونکی عمر صمد د ډار د دې څرګندونو په اړه آفاق خبري آژانس سره خبرو کې وایي: «د پاکستان د بهرنیو چارو وزیر څرګندونې ښيي چې د ډیپلوماسۍ لار لا نه ده تړل شوې. دا هم د هغه رول تأییدوي چې قطر او ترکیه یې د منځګړیو په توګه لوبوي او هم په ډاګه کوي چې پاکستان لا هم د افغانستان د مسئلې او هغو ننګونو په اړه خبرو ته چمتو دی چې له نړیوالو شریکانو سره په تعامل کې ورسره مخ دی. همدارنګه، هغه راپورونه چې ګواکې کابل کې د پاکستاني طالبانو ځینې غړي دې نیول شوي دي، د دې ښکارندویي کوي، چې د ترینګلتیاوو کابو کولو په پار عملي ګامونه اخیستل کېږي.»
پخوانی ډیپلوماټ عزیز معارج بیا په دې اړه داسې لیدلوری لري: «د پاکستان د بهرنیو چارو وزیر څرګندونې واقعي حالت نشي منعکسولی. پاکستان له کلونو راهیسې د ځينو بهرنيو هېوادونو د ملاتړ له امله، د پولې په اوږدو او ان د افغانستان د پلازمېنې ترڅنګ امنیتي او پوځي پروژې عملي کړي دي. دا اقدامات د ترینګلتیاوو د زیاتېدو سبب شوي او د سولې د خبرو لپاره جدي اراده نه ده موجوده. همدارنګه، د پاکستان د امنیتي تګلارو یوه برخه کولای شي سیمه بېثباته کړي، ځکه دغه هېواد د بهرنيو قدرتونو د پروژو او ګټو تر اغېز لاندې دی.»
د پاکستان لومړي وزیر مرستیال او بهرنیو چارو وزیر اسحاقډار په دې غونډه کې ټینګار کړی، چې د افغانستان ثبات د دوی لپاره حیاتي دی او په خبره یې پاکستان پر خپلو ټولو ژمنو عمل کړی او لا هم اسلامي امارت سره خبرو اترو ته چمتو دی.