سعودي عربستان کې د اوکراین جګړې په اړه د امریکایي او روسي چارواکو ترمنځ خبرې اترې ګټورې وې.
د امریکا ولسمشر ډونالډ ټرمپ وایي، چې پرون سه شنبه (سلواغې ۳۰مه) د سعودي عربستان په پلازمېنه ریاض کې د دغه هېواد او روسي ډیپلوماټانو ترمنځ خبرې اترې ګټورې وې او په اوکراین کې د سولې هوکړې په اړه ډاډه دی.
ښاغلي ټرمپ چې په خپل شخصي قصر کې یې له خبریالانو سره خبرې کولې ویلي، ښایي د همدې میاشتې په لړ کې د روسیې له ولسمشر ولادمیر پوتین سره د اوکراین جګړې په اړه له نږدې وګوري.
ډونالډ ټرمپ همداراز یو ځل بیا ټینګار کړی، چې که دی ولسمشر وای، د اوکراین او روسیې تر منځ به جګړې نه وای پیل شوې. د هغه په خبره، اړتیا ده چې په اوکراین کې ټولټاکنې ترسره شي او د سولې هوکړې په شتون کې اوکراین کې د ناټو ځواکونو د ځای پر ځای کې په اړه مخالف هم نه دی.
ټرمپ د خپلو خبرو په یوه بله برخه کې ویلي: (روسیه غواړي، دا وحشیانه وضعیت ته د پای ټکی کېږدي، هره اونۍ زرګونه سرتېري وژل کېږي، دا ډېره بده ده، هغوی غواړي دغه بې مانا جګړې ته د پای ټکی کېږدي.)
بلخوا د روسیې د ولسمشر مرستیال چې د سعودي پلازمېنه ریاض کې یې له امریکایي لوري سره په خبرو کې برخه درلوده، له ناستې وروسته خبریالانو ته ویلي چې د دواړو لوریو ترمنځ خبرې اترې ګټورې وې.
یوري اوشاکوف زیاته کړې، چې د دواړو هېوادونو نظریات او دریځونه لا هم سره لیرې دي، خو په خبره یې نننۍ ناسته کې یې د اوکراین په اړه خبرې ګټورې وې.
په همدې حال، د اوکراین ولسمشر چې تمه وه د سعودي پلازمېنې ریاض ته سفر وکړي، دغه هېواد ته خپل سفر ځنډولی او یو ځل یې بیا ټینګار کړی چې د اوکراین د برخلیک په اړه به، هېڅ داسې هوکړه ونه مني، چې د دغه هېواد استازي پکې ګډون ونه لري.
د افغانستان د سولې لپاره د امریکا پخواني ځانګړي استازي زلمي خلیلزاد هم د اوکراین جګړې په اړه ځینې وړاندیزونه کړي دي. خلیلزاد پر خپله ایکس پاڼه لیکلي، چې د کیف او مسکو ترمنځ باید د نیول شویو ځمکو موضوعات حل او دا تضمین ترلاسه شي، چې روسیه پر اوکراین خپل تېري ته د پای ټکی کېږدي.
خلیلزاد همداراز زیاته کړې، اوکراین ته باید سولهساتي ځواکونه واستول شي او د سولې خبرو د لا ښه پرمختګ په پار دایمي اوربند وشي.
د اوکراین او روسیې ترمنځ جګړه د ۲۰۲۲ میلادي کال د فبرورۍ په (۲۴مه) نېټه پیل شوه، چې لا هم دوام لري او دواړو لورو ته پراخ ځاني او مالي زیانونه اوښتي دي.