وروسته له هغه چې د سوریې لنډمهالي حکومت د لبنان حزبالله د خپلو درېیو سرتېرو په وژلو تورن کړ، د سوریې پوځ یې په غبرګون کې د حزبالله ډلې پر مرکزونو راکېټي او توپچي بریدونو کړي دي.
د سوریې دولتي خبري آژانس (سانا) د یکشنبې (کب، ۲۶مه) د دغه هېواد د دفاع وزارت له قوله خبر ورکړ چې دغه درې سرتېري د حمص لویدیځ ته په ګډه پوله کې د حزبالله له لوري برمته او ورپسې په لبنان کې وژل شوي دي.
د سوریې دفاع وزارت ټینګار کړی چې د ځواب ویلو لپاره به له ټولو امکاناتو ګټه واخلي.
الجزیزې شبکې د سوریې لنډمهالي حکومت دفاع وزارت کې د یوې سرچینې له قوله راپور ورکړی، چې په دغو توپچي بریدونو کې د حزبالله ډلې د راټولېدو ځایونه په نښه شوي دي.
په همدې حال، د سوریې د بشري حقونو څارونکو ډلو ویلي، چې د سوریې د دفاع وزارت ځواکونو د لبنان پولې ته څېرمه د حزبالله مرکزونه بمبار کړي او دواړه لوري په سرحدي سیمو کې له نښتي دي.
د سوریې لنډمهالي حکومت دفاع وزارت همداراز مرستندویه ځواکونه، درنې وسلې او توپچي د لبنان پولې ته څېرمه ځای پر ځای کړي دي. له دې سره همهاله د لبنان پوځ هم سوریې سره سرحدي سیمو کې خپل ځواکونه پیاوړي کړي دي.
د سوریې د بشري حقونو څارونکو په دې تړاو زیاته کړې: «د یکشنبې په ورځ، د سوریې لنډمهالي حکومت د دفاع وزارت درې سرتېري په یوه کمین کې، چې ویل کېږي د لبنان حزبالله ډلې پورې تړلي وسلهوال وو، ووژل شول.»
د سوریې لنډمهالي حکومت تلویزیون (سوریا) هم ادعا کړې، چې د دوی پر ځواکونو بریدګر کس د لبنان د پوځ له لوري نیول شوی دی.
د لبنان حزبالله ډلې غبرګون
د لبنان حزبالله د اطلاعاتو څانګې اعلان کړی، چې دا غورځنګ د یکشنبې ورځې پېښو کې لاس نه لري او په دې تړاو یې هر ډول تورونه رد کړي دي.
د حزبالله د اطلاعاتو څانګې په یوه بیان کې زیاته کړې: «موږ د یکشنبې ورځې په پېښه کې لاس لرل په کلکه ردوو او یو ځل بیا ټینګار کوو چې حزبالله د سوریې د خاورې په پیښو کې هېڅ لاس نه لري.»
دا په داسې حال کې ده چې د بشار اسد د حکومت له پرځېدو وروسته او سوریه کې د لنډمهالي حکومت په جوړېدو سره، د دغه حکومت او حزبالله په څېر غورځنګونو ترمنځ اړیکې، چې پخوا یې له دمشق سره ګرمې اړیکې درلودې، سړې او ترینګلې شوې دي.
