آفاق خبري آژانس؛ کابل: د کډوالو او بېرته راستنېدونکو چارو وزارت ویاند عبدالمطلب حقاني وایي، چې د روان لمریز کال په پنځو میاشتو کې له ایران، پاکستان او ترکیې ۲۱۶ زره او ۲۲۵ کورنۍ هېواد ته راستنې شوې دي. ښاغلی حقاني آفاق خبري آژانس سره خبرو کې زیاتوي، چې د راستنو شویو کورنیو د افرادو شمېر یو میلیون او ۵۶ زره او ۱۷۰ تنو ته رسېږي.
عبدالمطلب حقاني آفاق خبري آژانس سره خبرو کې زیاتوي: «د روان لمریز کال له پیل د زمري تر وروستۍ نېټې په تېرو پنځو میاشتو کې ۲۱۶ زره او ۲۲۵ کورنۍ له ایران، پاکستان او ترکیې هېواد ته راستنې شوې دي.»
عبدالمطلب حقاني د خپلو خبرو په یوه بله برخه کې وایي، چې په دې موده کې د پاکستان له بندخونو ۶ زره او ۳۹۰ افغان بندیان هم آزاد او هېواد ته راستانه شوي دي. ښاغلی حقاني د خپلو څرګندونو په دوام وایي: «په همدې موده کې د را ګرځېدونکو له ډلې ۵۶۳ زره او ۴۹۸ کسان په انفرادي توګه هېواد ته راستانه شوي. همداراز ۶ زره او ۳۹۰ بندیان هم د پاکستان له مختلفو بندخونو آزاد او هېواد ته را ګرځېدلي دي، چې د راستنېدونکو ټولیز شمېر یو میلیون او ۶۲۶ زره او ۵۸ کسانو ته رسېږي.»
په ورته وخت کې د کډوالو حقونو یو شمېر فعالان راستنېدونکو افغانانو ته د اسانتیاوو پر برابرولو سربېره، له مرستندویه بنسټونو غواړي، چې په دې برخه کې اسلامي امارت سره همکاري وکړي. د دوی په باور، د افغان کډوالو ملاتړ په پار اړتیا ده په کور د ننه له اړوندو بنسټونو سره منسجم او همغږي پروګرامونه جوړ شي.
د کډوالو حقونو فعال جمعه خان پویا آفاق خبري آژانس سره خبرو کې په دې اړه زیاتوي: «دا مهال تمه ده اسلامي امارت د نړۍوالو بنسټونو په منځګړیتوب، له هغې ډلې د کډوالۍ نړۍوال سازمان باید له کوربه هېوادونو، په ځانګړي ډول ایران او پاکستان سره خبرې وکړي او د دې خبرو موخه د هغو کډوالو ملاتړ او د هغوی ستونزو ته رسېدنه وي، چې له جدي ګواښونو سره مخامخ دي.»
د کډوالو حقونو بل فعال گلا خان بهادري بیا په دې اړه داسې لیدلوری لري: «په نړۍواله کچه اړتیا ده، چې له ملګرو ملتونو او نورو نړۍوالو بنسټونو سره همکاري وشي، څو د افغان کډوالو حقونه خوندي شي. د دې ترڅنګ راستنېدونکو ته د روغتیایي او ښوونیزو خدمتونو رسولو یوه جدي اړتیا ده او په کار ده، چې په دې برخه کې ملي برنامې پراخې او د حکومت او مرستندویه بنسټونو ترمنځ همکاري او همغږي زیاته شي.»
د شنونکو په بارو، له ګاونډیو هېوادونو د افغان کډوالو راستنېدل په کور د ننه د سراسري امنیت او ثبات ټینګښت ښکارندویي کوي او په خبره یې، دا بهیر کولی شي د هېواد په اقتصادي وده کې رغنده رول ولوبوي. همداراز د پاکستان له بندخونو د زرګونه افغان بندیانو آزادېدل، له هېواده د باندې د افغانانو له حقونو د ملاتړ په پار، د اسلامي امارت د پرلهپسې ډیپلوماټیکو تعاملاتو او هلو ځلو نتیجه بلل کېږي.