آفاق خبري آژانس؛ کابل: د کرنې، اوبو لګولو او مالدارۍ وزارت ویاند غلام محمد کاظم شهامت وایي، چې دا مهال د هېواد په ۲۲ ولایتونو کې څه باندې ۴ زره او ۸۰۰ ممیزخونې فعالیت لري. ښاغلی شهامت آفاق خبري آژانس سره خبرو کې زیاتوي، چې هره یوه ممیزخونه له ۷ تر ۲۰ مټریک ټنو ممیزو د ساتنې ظرفیت لري.
غلام محمد کاظم شهامت آفاق خبري آژانس سره خبرو کې زیاتوي: «د هېواد په کچه، دا مهال په ۲۲ ولایتونو کې شاوخوا ۴ زره او ۸۴۶ ممیزخونې جوړې شوې، چې هره یوه یې له ۷ تر ۲۰ مټریک ټنو ممیزو د ساتنې ظرفیت لري. دا ممیزخونې د دولتي او غیر دولتي بنسټونو په همکارۍ جوړې شوې او د انګورو بازار په ښهوالي او همداراز د دې مېوې د ضایعه کېدو مخنیوي په برخه کې یې مهم رول لوبولی دی.»
له دې سره هممهاله، د اقتصادي چارو شنونکي وایي، چې د کرنیزو محصولاتو د ساتنې لپاره د سړو خونو جوړول او همداراز په معیاري توګه د کرنیزو محصولاتو بستهبندي کولی شي، د هېواد په اقتصادي وده کې اغېزمن رول ولري.
د اقتصادي چارو شنونکی امیدالله قاسمزی د ممیز خونو او سړو خونو په اړه آفاق خبري آژانس سره خبرو کې وایي: «ممیز د هېواد له مهمو صادراتي توکو شمېرل کېږي، که چېرې د ممیزو ساتنې لپاره معیاري سړې خونې جوړې او د نړۍوالو معیارونو سره سم بستهبندي شي، کولی شي د هېواد په اقتصادي وده کې مهم رول ولوبوي.»
د اقتصادي چارو بل شنونکی محمد طاووس فرزاد بیا آفاق خبري آژانس سره خبرو کې زیاتوي: «افغانستان کې د سړو خونو شتون یوه اړتیا ده، دا مهال افغانستان کې د مېوو او سبزۍ موسم دی، که په کافي اندازه سړې خونې ولرو، کروندګر کولی شي خپل محصولات وساتي او بازار ته په کتو پلور ته وړاندې کړي.»
افغانستان چې اقتصاد یې تر ډېره په کرنه ولاړ دی، وروستیو کې د اقلیمي بدلونونو له امله سخت اغېزمن شوی دی. د اوبو سرچینو کمښت، پرلهپسې وچکالۍ، د سیندونو اوبو بېساری کمښت، هغه څه دي، چې د کرنې سکتور یې تر ډېره اغېزمن کړی دی.
