آفاق خبري آژانس؛ کابل: له چین او پاکستان سره د افغانستان سوداګریزو اړیکو په وروستیو کلونو کې له بیلابیلو پړاونو سره مخ شوي.
په داسې حال کې چې پاکستان د سوداګریزو بندرونو په پرله پسې تړلو سره د افغانستان د سوداګرۍ د ودې مانع شوی، خو بیجنګ په اقتصادي تعاملاتو کې د ثبات له ساتلو سره، د کابل پر باوري شریکانو بدل شوی دی.
د صنعت او سوداګرۍ وزارت ویاند اخندزاده عبدالسلام جواد وایي، د روان زیږدیز کال په لومړیو ۹ میاشتو کې، له چین سره د سوداګرۍ کچه ۷۴۵ میلیونه ډالرو ته رسیدلې چې له دې ډلې، ۱۸ میلیونه صادرات او ۷۲۷ میلیونه ډالره واردات دي.
د صنعت او سوداګرۍ وزارت ویاند اخندزاده عبدالسلام جواد په دې تړاو وایي: « د روان کال په لومړیو ۹ میاشتو کې، له چین سره د سوداګرۍ کچه ۷۴۵ میلیون ډالرو ته رسیدلې، چې له دې ډلې ۱۸ میلیونه ډالر صادرات او ۷۲۷ میلیونه ډالره واردات وو. په صادراتو کې جلغوزي، د زردالو کښتې، او قیمتي او نیمه قیمتي ډبرې دي.»
په ورته مهال، د اقتصادي چارو ځینې شنونکي په دې باور دی چې چین کولای شي د افغانستان لپاره د پاکستان بدیل بازار وي.
دوي ټینګار کوي چې د افغانستان پر وړاندې د پاکستان د دوه ګوني سیاست له مخې، پر پاکستان د افغانستان تیکه په تدریجي ډول راکمول یوه اړتیا ده.
دوی دغه راز وايي، چین کولی شي مناسب ځای ناستی و اوسي او د افغانستان د صادراتو او اړتیا وړ توکو د وارداتو لپاره ښه فرصتونه برابر کړي.
د اقتصادي چارو شنونکی تاج محمد تلاش د یادې موضوع په اړه وایي: « دا اړینه ده چې زموږ د هیواد اقتصادي تمې او په پاکستان پورې تړاو په تدریجي او هدفمند ډول کمه شي، ځکه چې په تیرو پنځوسو کلونو کې، پاکستان تل د افغانستان په وړاندې دښمنانه او غیر عادلانه اقتصادي پالیسۍ غوره کړې، او دا په عمل کې څو ځله ثابته شوې ده.»
دا په داسې حال کې ده چې پاکستان له څه باندې شلو ورځو راهیسې د افغانستان د سوداګرۍ او ټرانزیټ پر مخ سوداګریز بندرونه تړلي او دا چاره لامل شوې چې د دواړو هېوادونو ترمنځ سوداګریزه راکړه ورکړه د پام وړ کمه شي او د دواړو خواو سوداګرو ته درانه مالي زیانونه هم واوړي.