آفاق خبري آژانس؛ کابل: د صنعت او سوداګرۍ وزارت ویاند آخندزاده عبدالسلام جواد وایي، چې د دغه وزارت وزیر نورالدین عزیزي د افغانستان لپاره د قطر سفارت له شارژدافیر مردف القاشوطي سره لیدلي دي. د ښاغلي جواد په خبره، په دې لیدنه کې دواړو لورو د اړیکو پر پراختیا، د افغانستان او قطر ترمنځ د سوداګرۍ زیاتوالي او اوږدمهاله پانګونې جلبولو په اړه خبرې کړې دي. آخندزاده عبدالسلام جواد ټینګار کوي، چې په دې لیدنه کې د قطر شارژدافیر ښاغلي عزیزي ته د دوحې د سفر بلنه ورکړې ده.
آخندزاده عبدالسلام جواد د دې لیدنې په اړه زیاته کړې: «په دې لیدنه کې دواړو لورو د افغانستان او قطر شاهي هېواد ترمنځ د اړیکو پراختیا، د دواړو هېوادونو ترمنځ د سوداګرۍ زیاتوالي او اوږدمهاله پانګونو جلبولو په اړه بحث او خبرې وکړې او همداراز د قطر شاهي هېواد سفیر د صنعت او سوداګرۍ وزیر ته دغه هېواد ته د سفر بلنه ورکړه.»
له دې سره هممهاله، د اقتصادي چارو یو شمېر شنونکي وایي، چې د قطر او افغانستان ترمنځ د سوداګریزو اړیکو پراختیا کولی شي د صادراتو، ټکنالوژۍ لېږد او پانګونې په برخو کې نوي ګډ فرصتونه رامنځته کړي. د دوی په باور، دا ډول لیدنې د سیمې په کچه د افغانستان د اقتصادي جایګاه پیاوړتیا لپاره ګټورې دي.
د اقتصادي چارو شنونکی وحید احمد فراهي د دې لیدنې په اړه وایي: «د پانګونې جذب، د سیاسي اړیکو پراختیا، د افغانستان کاني توکو صادراتو په موخه نړۍوالو بازارونو ته لاسرسی او همداراز د ځینو ګډو پروژو د عملي کېدو په پار هلې ځلې، مهم لومړیتوبونه دي. د دې ترڅنګ د افغانستان ملي ګټو په پام کې نیولو سره، د ظرفیتونو کره معرفي او اقتصادي فرصتونه، بهرني پانګهوال افغانستان کې پانګونې ته هڅوي او د قانون په چوکاټ کې کولی شي، ګټورې او رغنده پایلې ولري.»
د اقتصادي چارو بل شنونکی عیسی مبارز بیا په دې اړه داسې لیدلوری لري: «د پانګونو جذب او له نورو هېوادونو د تولیدي ماشینرۍ راوړل او په افغانستان کې یې کارونه هغه څه دي، چې اسلامي امارت ډېر کار ورباندې کړی او توانېدلی په دې برخه کې بریالی هم شي.»
دا په داسې حال کې ده، چې وروستیو کلونو کې قطر د سیمې په اقتصادي او سیاسي برخو کې یو فعال هېواد دی او له نړۍوالې ټولنې سره یې د افغانستان د تعاملاتو په برخه کې تل رغنده رول لوبولی دی. د افغانستان او قطر ترمنځ د اړیکو مخینې او همداراز په سیاسي او اقتصادي برخه کې د دغه هېواد مثبت رول ته په کتو، د کابل او دوحې ترمنځ د سوداګرۍ پراختیا کولی شي د افغانستان په اقتصادي وده او همداراز پانګونې جلب په برخه مرسته وکړي.