آفاق خبري آژانس؛ کابل: د وسپنې ویلې کولو کارخونو ټولنې اجراییوي رییس عبدالنصیر رشتیا وایي، چې دا مهال په هېواد کې د وسپنې ویلې کولو ۴۲ کارخونې فعالیت کوي، چې ټولټال ۵۰۰ میلیون ډالر پانګونه ورباندې شوې او شاوخوا ۲۰ زره کسان په دې کارخونو کې په کار بوخت دي.
ښاغلی رشتیا همداراز زیاتوي، چې افغانستان دا مهال د وسپنې ویلې کولو په برخه کې ځانبسیاینې ته رسېدلی او د سرپرست حکومت له مسوولینو د وسپنې تولیداتو ته په کور د ننه او بهر د بازار موندنې غوښتنه کوي.
د وسپنې ویلې کولو کارخونو ټولنې اجراییوي رییس په دې اړه آفاق خبري آژانس ته زیاته کړه: «موږ په افغانستان کې د اوسپنې او فولادو ۴۲ فابریکې لرو، په دې برخه کې شاوخوا ۵۰۰ ملیون ډالر پانګونه شوې او موږ توانیدلي یو چې شاوخوا ۲۰زره خلکو ته دندې پیدا کړو. افغانستان د اوسپنې او فولادو په سکتور کې په ځان بسیا شوی او زموږ محصولات آهن گاډر، سیخ ګول او انګلارنډ دي چې په افغانستان کې جوړیږي.»
د اقتصادي چارو شنونکی احمد فردوس بهګزین بیا په دې اړه وویل: «د فولادو په هره فابریکه کې چې موږ له یو یا دوه سوه څخه ډیر کارمندان لرو، دا پخپله د کورنۍ اقتصادي بنسټ ته ودوه ورکوي او د بیکارۍ مخه نیسي.»
په همدې حال، د صنعت او سوداګرۍ وزارت وایي، چې تېر کال ۶۰ زره ټنه سیخ ګول پاکستان ته صادر شوی دی.
د دغه وزارت ویاند زیاتوي، چې روان کال یې ترکمنستان هېواد سره د ۱۵۰ ټنه سیخګول د صادرېدو تړون لاسلیک کړی دی.
د صنعت او سوداګرۍ وزارت ویاند اخندزاده عبدالسلام جواد په دې اړه آفاق خبري آژانس ته زیاته کړه: « بې له شکه، افغانستان د سیمې له هېوادونو سره سوداګري کوي. تېر کال موږ پاکستان ته ۶۰زره ټنه صادر کړل او سږ کال موږ ترکمنستان ته د ۱۵۰، ټنو قراردادونه لرو.»
د ویلو ده، چې د افغانستان د فولادو سکتور لومړنی سکتور دی، چې خام مواد یې په کور د ننه چمتو کېږي. د وسپنې ویلې کولو کارخونو ټولنې د مسوولینو په خبره، ښایي دا مواد تر راتلونکو دوو کلونو خلاص شي او ټینګار کوي، چې اسلامي امارت باید یو کان د فولادو صنعتګرو په واک کې ورکړي.
