آفاق خبري آژانس؛ کابل: د افغانستان بانک ویاند حسیب الله نوري وایي، چې په تیر یوه کال کې یاد بانک د ۳میلیارده او ۳۶۳ میلیونه افغانیو په ارزښت زاړه بانکنوټونه را ټول کړي او بازار کې یې د کارونې مخه نیولې ده.
د ښاغلي نوري په وینا دغه بانکنوټونه د هیواد له بېلابېلو زونونو راټول شوي او د یاد بانک له لوري سوځول شوي دي.
حسیب الله نوري په دې اړه زیاته کړه: «په تیر یو کال کې افغانستان بانک توانیدلی ده چې د هیواد له مختلفو زونونو څخه د ۳ میلیارده او ۳۶۳ افغانیو په ارزښت زاړه بانکنوټونه راټول او بازار کې یې د کارونې مخنیوی وکړي. هیواد وال هم باید په دې برخه کې پاملرنه وکړي، څو پیسې له وخت مخکې زړې نشي، او د افغانستان بانک اړ نشي چې هغه وسوځوي.»
ورته مهال، د اقتصادي چارو ځینې کارپوهان د پیسو زر زړیدو د مخنیوی په پار د الکترونیکی بانکنوټونه دودېدل، عامه پوهاوی او د پیسو ساتنې برخه کې د یو ځانګړي میکانیزم جوړول اغیزناک بولي.
د اقتصادي چارو شنونکي سیر قریشی په دې اړه آفاق ته وویل: «د ډیجیټل بانکنوټونو د ترویج لپاره باید ډیر کار وشي، او د افغانستان بانک یې باید ډیرعام کړي په دې برخه کې عامه پوهاوی ډیر اړین دی چې د اعلانونو له لارې باید ترسره شي.»
د اقتصادي چارو بل شنونکي لعل ځاځی بیا وایي: «د الکترونیکی باندارۍ لپاره باید کار ترسره شي تر څو وکولای شو د پیسو له فزیکی ګردښ څخه مخنیوی وکړو او کچه یې را کمه کړو، همدارنګه الکترونیکی بانکدارۍ مثبتې پایلې هم لري.»
دا په داسې حال کې ده، چې د اسلامی امارت له بیا ځلې واکمنیدو وروسته، په ۱۴۰۲ لمریز کال کې یو پولنډي شرکت د لومړي ځل لپاره د افغانۍ بانکنوټونه، چې لس ګون، شل ګون، ۵۰ او سل ګون پکې شامل وو چاپ او افغانستان ته یې ولیږدول.