آفاق خبري آژانس؛ کابل: د اسلام آباد له لوري د اوربند له پرله پسې سرغړونو وروسته، د پاکستان د بهرنیو چارو وزارت ویاند په اوونیزه غونډه کې وویل چې د پاکستان او افغانستان ترمنځ اوربند د یو قراردادي اوربند ماهیت نه لري، بلکې د بریدونو د بندیدو په مانا دی چې د نوموړي د ادعا له مخې، په افغانستان کې د میشتو ډلو له لوري ترسره کیږي.
د پاکستان د بهرنیو چارو وزارت د ویاند په وینا، ځینې عناصر د افغانستان له خاورې د پاکستان پر وړاندې اقدام کوي او ددې وضعیت دوام، د ترینګلتیاوو کمولو په تړاو د هر ډول خوشبینۍ مانع شوی دی.
د پاکستان بهرنیو چارو وزارت ویاند طاهر حسین اندرابي وايي:«هغه اوربند چې د پاکستان او افغانستان ترمنځ وړاندیز شوی دی، د دواړو شخړو کې ښکېلو هېوادونو ترمنځ قراردادي اوربند نه دی. موخه یې دا وه چې د افغانستان له خاورې څخه د نیابتي ډلو لخوا د پاکستان پر وړاندې د هر ډول ترهګریزو بریدونو مخه ونیول شي. خو له دې اوربند وروسته لوی ترهګریز بریدونه شوي دي. په دې مانا چې، اوربند په خپل ځای نه دی، او د دې بریدونو په دوام سره، څوک د اوربند په اړه خوشبین کیدای نه شي.»
د سیاسي چارو شنونکی حمید الله مفید وايي:«د افغانستان او پاکستان ترمنځ تړون د ترکیې او قطر تر څارنې لاندې د دوو اونیو لپاره لاسلیک شو. په دې تړون کې دواړو خواوو ژمنه وکړه چې د یو بل امنیت ته درناوی وکړي او د بل لوري پر وړاندې به هیڅ ډول تیری ونه کړي. د پاکستان امنیت په بشپړه توګه د پاکستان په لاس کې دی او افغانستان د پاکستان په امنیتي چارو کې هیڅ مسؤلیت یا نفوذ نلري.»
په ورته مهال، د سیاسي چارو ځينې شنونکي وایي، پاکستان نه غواړي دا اوربند ټینګ وي، ځکه پاکستانیان وایي چې رسمي چارچوب او د پلي کېدو ضمانت نه لري او د بریدونو او بې ثباتۍ په دوام سره اوربند بې مانا ګڼي.
د سیاسي چارو شنونکی میاګل وثیق وايي:«د پاکستان او افغانستان ترمنځ وړاندیز شوی اوربند رسمي، ضمانتي اوربند نه دی؛ یعنې دا داسې تړون نه دی چې د دواړو خواوو لخوا لاسلیک او تصویب شوی وي یا د سرغړونو د څارنې او حل کولو لپاره میکانیزم ولري. په رسمي اوربند کې، د ژمنو د سرغړونې لپاره پایلې شتون لري، خو په دې حالت کې، داسې کوم چوکاټ نه دی تعریف شوی. کله چې بریدونه، مداخلې، بمبارۍ او د تاوتریخوالي کړنې دوام ومومي، د اوربند په اړه خبرې نشي کیدی. پاکستان هم له داسې اوربند سره علاقه نلري چې بهرنی شتون او د پلي کولو تضمین ونه لري.»
دا په داسې حال کې ده چې پاکستان د تیرې اوونۍ د سه شنبې په سهار د خوست، کونړ او پکتیکا پر ځینو برخو هوایي بریدونه وکړل چې له امله یې لسو ملکي وګړو ژوند له لاسه ورکړ او څلور نور ټپیان شول.
اسلامي امارت د دغه برید په غبرګون کې هغه د هوایي حریم او ټولو نړیوالو نورمونو ښکاره نقض وباله او په کلکو ټکو یې وغانده.
د اسلامي امارت ویاند ذبیح الله مجاهد دغه راز ټينګار وکړ چې له افغانستان او افغانانو دفاع د اسلامي امارت شرعي حق دی او په مناسب وخت کې به ځواب ورکړل شي.